ស៊ីរី ជំរុញឱ្យអន្តរជាតិចាត់វិធានការប្រឆាំងពួកភេរវករ ក្រោយការវាយប្រហារ បំផ្ទុះគ្រាប់បែកក្នុងរដ្ឋធានីដាម៉ាស់
ដាម៉ាស់ ៖ ក្រសួងការបរទេសស៊ីរី នៅថ្ងៃពុធសប្ដាហ៍នេះបានជំរុញឱ្យសហគមន៍អន្តរជាតិ និងអង្គការសហប្រជាជាតិថ្កោលទោសការវាយប្រហារបំផ្ទុះគ្រាប់បែក ដ៏ប្រល័យមួយនៅក្នុងរដ្ឋធានីដាម៉ាស់ ដែលបានផ្ដាច់ជីវិតមនុស្ស១៤នាក់។ នេះបើតាមប្រព័ន្ធផ្សព្វផ្សាយរដ្ឋស៊ីរី ដកស្រង់ចេញផ្សាយដោយទីភ្នាក់ងារព័ត៌មានចិនស៊ីនហួរ នៅថ្ងៃព្រហស្បតិ៍ ទី២១ ខែតុលា ឆ្នាំ២០២១។
ក្រសួងដដែលបានបន្តថា ប្រទេសស៊ីរីបានអំពាវនាវឱ្យសហគមន៍អន្តរជាតិ និងអង្គការសហប្រជាជាតិ ថ្កោលទោសទៅលើការបំផ្ទុះគ្រាប់ បែកនេះ ដោយផ្តោតលើជនស៊ីវិលដែលគ្មានអាវុធ ហើយស៊ីរីក៏បានអំពាវនាវឱ្យក្រុមប្រឹក្សាសន្តិសុខចាត់វិធានការរារាំងប្រឆាំងនឹងរដ្ឋដែលគាំទ្រផ្តល់ហិរញ្ញប្បទានភេរវកម្មនៅក្នុងប្រទេសផងដែរ។
សូមជម្រាបថា ហេតុការណ៍បំផ្ទុះគ្រាប់បែកនេះបានកើតឡើងនៅពេលដែលក្រុមឧទ្ទាមជ្រុលនិយមបានទទួលរងការឈឺចាប់ ដោយសារការរីកចម្រើនរបស់យោធាស៊ីរី ជាពិសេសនៅជិតទីក្រុងអ៊ីដលីប (Idlib) ជាបន្ទាយចុងក្រោយរបស់ក្រុមឧទ្ទាមដែលមានទីតាំងស្ថិតនៅភាគពាយ័ព្យប្រទេសស៊ីរី៕