សិង្ហ​បុរី​ព្រមានពីហានិភ័យ​ធ្ងន់ធ្ងរ ក្រោយការកើនឡើង​នៃករណីឆ្លង​កូ​វីដ១៩ ក្នុង​ចំនួន​ដ៏​ច្រើន​លើសលប់ ​

សិង្ហ​បុរី​ ៖ មន្ត្រី​រដ្ឋាភិបាល​សិង្ហ​បុរីបាន​ព្រមានកាលពី​ថ្ងៃ​ពុធ​ថា ប្រព័ន្ធ​សុខាភិបាល​របស់​សិង្ហ​បុរី​កំពុង​ប្រឈម​នឹង​ហានិភ័យ ក៏ដូចជា​ជួប​វិបត្តិ​ធ្ងន់ធ្ងរ ដោយសារ​ការកើនឡើង​នៃ​អ្នកជំងឺ​កូ​វីដ ១៩ ក្នុង​ចំនួន​ដ៏​ច្រើន​លើសលប់ បន្ទាប់ពី​រដ្ឋ​-​ទីក្រុង​មួយ​នេះ បាន​ពង្រីក​ការធ្វើដំណើរ​ដោយ​មិន​ឲ្យ​ធ្វើ​ច​ត្តា​ឡី​ស័ក​។

ការលើកឡើង​នេះ​បានធ្វើ​ឡើង១ថ្ងៃ បន្ទាប់ពី​ប្រទេសមួយ​នេះ​បាន​ពង្រីក​ការធ្វើការ​ដំណើរ​ដោយ​មិនចាំបាច់​ធ្វើ​ច​ត្តា​ឡី​ស័ក​ដល់​អ្នកដំណើរ​ដែល​ចាក់​វ៉ាក់សាំង​បាន​ពេញ​ដូ​ស​ពី​ប្រទេស​ចំនួន ៨ ក្នុងនោះ​រាប់ទាំង​ប្រទេស​ជា​ដៃគូ​ពាណិជ្ជកម្ម​សំខាន់​គឺ សហរដ្ឋអាមេរិក អង់គ្លេស និង​បារាំង​ផងដែរ​

លោក Lawrence Wong អនុប្រធាន​ក្រុមការងារ​ប្រយុទ្ធ​នឹង​ជំងឺ​កូ​វីដ​-១៩ សិង្ហ​បុរីបាន​លើកឡើងថា ស្ថានភាព​បច្ចុប្បន្ននេះ យើង​កំពុង​ប្រឈម​នឹង​ហានិភ័យ​ធ្ងន់ធ្ងរ​នៃ​ប្រព័ន្ធ​សុខាភិបាល​ដែល​ត្រូវ​ផ្ទុក​អ្នកជំងឺ​ដ៏​ច្រើន​លើសលប់​។ ​លោក​បញ្ជាក់ថា គ្រែ​សម្រាប់​អ្នកជំងឺ​ជិត៩០ភាគរយ នៅ​មន្ទីរពេទ្យ​ពេញ​ទៅដោយ​អ្នកជំងឺ ហើយ​ជាង ២ ភាគ ៣ នៃ​គ្រែ​សង្គ្រោះបន្ទាន់​ក៏​ពេញ​ដោយ​អ្នកជំងឺ​ដូចគ្នា​ផងដែរ​។​

បើតាមរបាយការណ៍ក្រសួងសុខាភិបាល​សិង្ហ​បុរីបាន​ឲ្យ​ដឹងកាលពី​ថ្ងៃ​ពុធ​ថា មាន​អ្នកស្លាប់​ដោយសារ​ជំងឺ​កូ​វីដ១៩ ចំនួន១៨នាក់ ដែលជា​ចំនួន​ខ្ពស់បំផុត​ក្នុង១ថ្ងៃ និង​មាន​ករណី​ឆ្លង​ថ្មី​ចំនួន៣.៨៦២បន្ថែមទៀត ដោយ​ជិត​ស្មើនឹង​កំណត់ត្រា​ឆ្លង​ច្រើន​បំផុត​ក្នុង១ថ្ងៃ​ចំនួន ៣.៩៩៤ ករណី កាលពី​ពេលមុន​៕