កាតា ៖ មន្រ្តីរបស់សហរដ្ឋអាមេរិកបានធ្វើការជួបទល់មុខផ្ទាល់ជាមួយ ក្បាលម៉ាស៊ីនដឹកនាំរបស់អាហ្វហ្គានីស្ថាន គឺក្រុមតាលីបង់ គ្រាដែលជាការជួបជជែកពិភាក្សាទល់មុខគ្នានេះ គឺជាលើកដំបូង ចាប់តាំងពីក្រុងវ៉ាស៊ីនតោនបានដកទ័ពចេញអស់ជាស្ថាពរ កាលពីខែសីហា កន្លងទៅ។

សារព័ត៌មាន BBC បានចុះផ្សាយថា ការជួបប្រជុំរវាងមន្រ្តីតំណាងសហរដ្ឋអាមេរិក និងក្រុមតាលីបង់ បានប្រព្រឹត្តឡើងនៅប្រទេស កាតា។ កិច្ចប្រជុំផ្តោតសំខាន់ទៅលើក្រុមសកម្មប្រយុទ្ធ ក្នុងប្រទេសអាហ្វហ្គានីស្ថាន ដែលកំពុងប្រមូលផ្តុំគ្នាឡើងវិញ​ជាបន្តបន្ទាប់។ មួយវិញទៀត សហរដ្ឋអាមេរិក ក៏បានលើកយកបញ្ហាជម្លៀសប្រជាជនខ្លួនដែលនៅសេសសល់ ចេញផងដែរ។

រដ្ឋមន្រ្តីការបរទេសតាលីបង់ Amir Khan Muttaqi បាននិយាយថា អាមេរិកនឹងជួយផ្តល់វ៉ាក់សាំងបង្ការជំងឺកូវីដ១៩ រួមទាំងជំនួយមនុស្សធម៌ផ្សេងៗទៀត មកកាន់ប្រទេសអាហ្វហ្គានីស្ថាន។ តាលីបង់តែងតែចិញ្ចឹមចិត្តចង់ភ្ជាប់ទំនាក់ទំនងល្អជាមួយសហគមន៍អន្តរជាតិ ប៉ុន្តែក្រុមរដ្ឋឥស្លាមមួយនេះ​បានព្រមានប្រទេសដទៃ គប្បីមិនត្រូវលូកដៃចូលរឿងផ្ទៃក្នុងរបស់ប្រទេសអាហ្វហ្គានីស្ថានឡើយ៕