WHO ៖ កូរ៉េខាងជើងនៅតែជាប្រទេសដែលគ្មានករណីឆ្លងកូវីដសម្បីតែមួយ
ព្យុងយ៉ាង ៖ របាយការណ៍អង្គការសុខភាពពិភពលោក (WHO) បានបង្ហាញនៅថ្ងៃអង្គារថា ប្រទេសកូរ៉េខាងជើងបានធ្វើតេស្ដរកជំងឺកូវីដ១៩ លើមនុស្សប្រហែល ៤២.០០០ នាក់ ប៉ុន្តែលទ្ធផលគឺមិនវិជ្ជមានសម្បីតែម្នាក់សោះ។
យោងតាមរបាយការណ៍ស្ថានភាពជំងឺកូវីដ១៩ ប្រចាំសប្តាហ៍របស់ WHO បញ្ជាក់ថា ប្រជាជនកូរ៉េខាងជើងមានចំនួនសរុប ៦៧៨ នាក់ ដែលបានធ្វើការតេស្តរកជំងឺកូវីដ ១៩ ដោយគិតចាប់តាំងពីថ្ងៃទី៨ ដល់ថ្ងៃទី១៤ ខែតុលា កន្លងទៅ ប៉ុន្តែអ្នកទាំង៦៧៨នាក់នោះ គឺលទ្ធផលអវិជ្ជមានទាំងអស់តែម្ដង។
ដោយឡែក សម្រាប់របាយការណ៍ចុងក្រោយ បានបង្ហាញថា ក្នុងចំណោមប្រជាជនកូរ៉េខាងជើងដែលទើបនឹងធ្វើតេស្ត នាពេលថ្មីៗនេះ មានចំនួន ១១៣ នាក់ ដោយពួកគេគ្រាន់តែមានជំងឺផ្តាសាយ ឬការឆ្លងមេរោគផ្លូវដង្ហើមធម្មតាប៉ុណ្ណោះ។
គួរបញ្ជាក់ថា របាយការណ៍របស់ WHO ខាងលើនេះដែលបង្ហាញថា ប្រទេសកូរ៉េខាងជើងគ្មានករណីឆ្លងកូវីដសូម្បីតែមួយករណី ពេលនេះកូរ៉េខាងជើងបានអះអាងថា ដោយសារការចាត់វិធានការប្រឆាំងនឹងជំងឺនេះបានល្អ រួមទាំងការគ្រប់គ្រងច្រកព្រំដែនបានតឹងរ៉ឹងផងដែរ៕