អង់គ្លេស ៖ ក្រុម​បិសាច​ក្រហម Manchester United បាន​និយាយថា Paul Pogba នឹងមិន​ចុះ​កុងត្រា​ថ្មី​ជាមួយ​ក្លឹប​នោះទេ ហើយ​ខ្សែបម្រើ​រូបនេះ​នឹង​ចាក​ចេញពី Old Trafford ដោយ​គ្មាន​តម្លៃ​ខ្លួន​នៅ​ឆ្នាំក្រោយ ពេល​កិច្ចសន្យា​របស់គេ​ផុតកំណត់​។​

​កិច្ចព្រមព្រៀង​ដែលមាន​ស្រាប់​របស់​កីឡាករ​សញ្ជាតិ​បារាំង​ជាមួយ​បិសាច​ក្រហម​នឹង​ផុតកំណត់​នៅ​ខែមិថុនា ឆ្នាំក្រោយ ហើយ​ក្លឹប​បាន​ពិភាក្សា​ជាមួយ​កីឡាករ​វ័យ២៨ឆ្នាំ​ក្នុង​គោលបំណង់​បន្ត​កុងត្រា​មួយរយៈ​ទៀត​។​

​ប៉ុន្តែ​ទោះជា​យ៉ាងណាក៏ដោយ ភ្នាក់ងារ​របស់ Pogba លោក Mino Raiola ថ្មីៗ​នេះ​បាន​បង្ហើប​ថា​មិនមាន​ចលនា​ណាមួយ​បន្ត​កុងត្រា​នោះទេ ខណៈ Real Madrid, Juventus និង Paris Saint-Germain សុទ្ធតែ​កំពុង​ចាប់អារម្មណ៍​កីឡាករ​រូបនេះ​។​

​យោងតាម​សារព័ត៌មាន ESPN បាន​ឲ្យ​ដឹងថា ម្ចាស់​ជើងឯក​អង់គ្លេស ២០ សម័យកាល បាន​ទទួលស្គាល់ថា Pogba នឹងមិន​ចុះហត្ថលេខា​លើ​កិច្ចព្រមព្រៀង​ថ្មី​នោះទេ ហើយ​រូបគេ​អាច​នឹង​ចាកចេញ​នៅ​រដូវ​កាល​ក្រោយ​។​

Man Utd អាច​ព្យាយាម​លក់ Pogba ក្នុង​ខែមករា​ខាងមុខនេះ ប៉ុន្តែ​របាយការណ៍​បាន​អះអាងថា ក្រុម​របស់លោក Ole Gunnar Solskjaer ត្រៀម​នឹង​បាត់បង់​ខ្សែបម្រើ​រូបនេះ ក្នុងការ​ផ្ទេរ​ដោយ​គ្មាន​តម្លៃ​ខ្លួន​នៅ​ចុងបញ្ចប់​នៃ​រដូវ​កាល​នេះ​។​

​កីឡាករ​សញ្ជាតិ​បារាំង​រូបនេះ​នឹង​មិនមាន​វត្តមាន​សម្រាប់​ការប្រកួត Premier League ៣​ប្រកួត​ជាមួយ Tottenham Hotspur, Manchester City និង Watford បន្ទាប់ពី​បានទទួល​កាត់​ក្រហម​ពេល​ចាញ់ Liverpool ៥-០ កាលពី​ចុង​សប្តាហ៍​មុន​។​

​សូមជម្រាបថា Pogba ធ្លាប់​ចាកចេញ​ពី Old Trafford ដោយ​គ្មាន​តម្លៃ​ខ្លួន ក្នុង​ឆ្នាំ ២០១២ ដើម្បី​ចូលរួម​ជាមួយ Juventus ហើយ​គាត់​បាន​ចំណាយពេល ៤ ឆ្នាំ​ជោគជ័យ​ជាមួយ​ក្លឹប​យក្ស​អ៊ីតាលី មុនពេល​ត្រលប់​ទៅ​បិសាច​ក្រហម​វិញ​ក្នុង​កិច្ចព្រមព្រៀង​តម្លៃ​៩០ លាន​ផោន​៕