​ពលរដ្ឋ​​រងគ្រោះ​ទឹក​ជំនន់​ទឹក​ភ្លៀង​ទឹក​សណ្ដស្ទឹង​ព្រែក​ត្នោតចំនួន​៥១៥គ្រួសារទទួលអំណោយ​សម្ដេច តេជោ និង​សម្ដេច​កិតិ្តព្រឹទ្ធ​បណ្ឌិត

ភ្នំពេញ ៖ ឯកឧត្ដម ឃួង ស្រេង អភិបាល នៃ​គណៈអភិបាល​រាជធានី​ភ្នំពេញ នា​ព្រឹកថ្ងៃ​ព្រហស្បតិ៍ ០៧រោច ខែអស្សុជ ឆ្នាំ​ឆ្លូវ ត្រីស័ក ព.ស.២៥៦៥ ត្រូវនឹង​ថ្ងៃ​ទី​២៨ ខែតុលា ឆ្នាំ២០២១នេះ នាំ​យក​អំណោយ​ដ៏​ថ្លៃ​ថ្លា​របស់​សម្ដេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា និង​សម្ដេច​កិតិ្តព្រឹទ្ធ​បណ្ឌិត ប៊ុន រ៉ានី ហ៊ុន​សែន ប្រធាន​កាកបាទក្រហម ចែកជូន​បងប្អូនប្រជា​ពលរដ្ឋ​ដែល​រងគ្រោះ​ទឹក​ជំនន់​ទឹក​ភ្លៀង​ទឹក​សណ្ដស្ទឹង​ព្រែក​ត្នោត ចំនួន​៥១៥គ្រួសារ។

ពិធីចែកអំណោយនេះ ធ្វើឡើងនាព្រឹកថ្ងៃទី២៨ ខែតុលា ឆ្នាំ២០២១ ក្នុងបរិវេណក្រុមហ៊ុនដឹកជញ្ជូនសំរាម Mizuda Group Co.,Ltd ស្ថិតនៅតាមបណ្ដោយផ្លូវ៣០ម៉ែត្រ ក្នុងសង្កាត់ស្ពានថ្ម ខណ្ឌដង្កោ។ ក្នុងឱកាសនោះដែរ ក៏មានវត្តមានឯកឧត្តម កែប ជុតិមា តំណាង រាស្ត្រមណ្ឌភ្នំពេញ ប្រធានក្រុមការងារចុះជួយខណ្ឌដង្កោ និងឯកឧត្តម ស៊ាង ប៊ុនលាង រដ្ឋលេខាធិការ ក្រសួងមហាផ្ទៃផងដែរ។

ឯកឧត្តម ឃួង ស្រេង បានបញ្ជាក់ថា អំណោយទាំងនេះ គឺជាអំណោយ របស់សម្តេចតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ដែលសម្ដេចទាំងពីរ បានឲ្យរដ្ឋបាលរាជធានីភ្នំពេញ នាំយកអំណោយទាំងនេះ មកចែកជូនដែលជួបការពិបាក ដោយសារទឹកជំនន់ ។ ឯកឧត្តមបញ្ជាក់ថា គិតមកដល់ព្រឹកថ្ងៃទី២៨ តុលានេះ ទឹកស្ទឹងព្រែកត្នោត បានស្រកចុះ៤តឹកហើយ ប៉ុន្តែទោះបីជាយ៉ាងណាក្តី ទាំងអាជ្ញាធរ ទាំងកម្លាំងមានសមត្ថកិច្ច និងកងអង្គរក្ស សម្ដេចតេជោ នៅតែឈរជើង នៅទីតាំងបញ្ជាការស្រាល ដើម្បីជួយដល់បងប្អូន ប្រជាពលរដ្ឋ ខណៈដែលពួកគាត់ត្រូវការជួយសង្គ្រោះ ដោយប្រការផ្សេងៗ។ សម្ដេចតេជោ ហ៊ុន សែននិងសម្ដេចគតិព្រឹទ្ធបណ្ឌិត ជានិច្ចជាកាល នៅជាប់ជាមួយប្រជាពលរដ្ឋជានិច្ច ពោលនៅពេលពលរដ្ឋមានបញ្ហាទុក្ខលំបាក សម្ដេចទាំងទ្វេនៅជាប់ជានិច្ច មិនទុកឲ្យពលរដ្ឋណាម្នាក់ ស្លាប់ដោយការអត់បាយនោះទេ ។

ឯកឧត្តម ឃួង ស្រេង បន្ថែមទៀតថា អំណោយជាអង្ករ របស់សម្តេចតេជោ និងសម្ដេចគតិព្រឹទ្ធបណ្ឌិតប៊ុនរ៉ានី ហ៊ុន សែន ចំនួន១០០០ តោន បានត្រៀមរួចរាល់ហើយ ដើម្បីចែកជូនប្រជាពលរដ្ឋ ដែលខ្វះខាតបន្តទៀត៕