UN បង្ហាញតួលេខសរុបចុងក្រោយនៃចំនួនជនស៊ីវិលអ៊ុយក្រែនដែលស្លាប់
ថ្ងៃចេញផ្សាយៈ ខែឧសភា 3, 2022
ហ្សឺណែវ ៖ ការិយាល័យសិទ្ធិមនុស្សរបស់អង្គការសហប្រជាជាតិ (OHCHR) បានបញ្ជាក់ថា ចំនួនជនស៊ីវិលដែលស្លាប់នៅក្នុងប្រទេសអ៊ុយក្រែន ចាប់តាំងពីការចាប់ផ្តើមនៃការលុកលុយរបស់រុស្ស៊ី កាលពីថ្ងៃទី ២៤ ខែកុម្ភៈ មកមានលើសពី ៣.០០០ នាក់។
OHCHR បានបញ្ជាក់ កាលពីថ្ងៃច័ន្ទថា អ្នកស្លាប់សរុបមានចំនួន ៣,១៥៣នាក់មកទល់ពេលនេះដែលកើនឡើងចំនួន ២៥៤ នាក់ កាលពីថ្ងៃសុក្រ ដោយបន្ថែមថា ចំនួនអ្នកស្លាប់ពិតប្រាកដទំនងជាខ្ពស់ជាងនេះ។
ការិយាល័យសិទ្ធិមនុស្សដដែល បានឲ្យដឹងថា ជនរងគ្រោះភាគច្រើនត្រូវបានសម្លាប់ ដោយសារអាវុធជាតិផ្ទុះដែលប៉ះពាល់យ៉ាងទូលំទូលាយ ដូចជាការវាយប្រហារដោយមីស៊ីល និងការវាយប្រហារតាមអាកាស ដោយមិនបង្ហាញពីការទទួលខុសត្រូវឡើយ៕