WHO អំពាវនាវដល់ក្រុមប្រទេស G20 ផ្តល់មូលនិធិដល់គម្រោង ២៣.៤ ពាន់លានដុល្លារសម្រាប់ប្រយុទ្ធប្រឆាំងកូវីដ
ញ៉ូវយ៉ក ៖ អង្គការសុខភាពពិភពលោក (WHO) និងដៃគូផ្សេងទៀតកាលពីថ្ងៃព្រហស្បតិ៍ម្សិលមិញបានអំពាវនាវដល់មេដឹកនាំនៃប្រទេសដែលមានសេដ្ឋកិច្ចធំបំផុតទាំង២០របស់ពិភពលោកឱ្យផ្តល់មូលនិធិដល់គម្រោងចំនួន២៣.៤ ពាន់លានដុល្លារ ដើម្បីនាំយកវ៉ាក់សាំង ឧបករណ៍ធ្វើតេស្ត និងថ្នាំប្រឆាំងនឹងជំងឺកូវីដ១៩ ទៅកាន់ប្រទេសក្រីក្រ ក្នុងរយៈពេល១២ខែខាងមុខ។ នេះពើយោងតាមទីភ្នាក់ងារសារព័ត៌មាន Reuter។
លោក Tedros Adhanom Ghebreyesus អគ្គនាយក WHO បាននិយាយថា ក្រុមប្រទេស G20 ដែលមេដឹកនាំគ្រោងប្រជុំនៅទីក្រុង រ៉ូម ចុងសប្ដាហ៍នេះ សុទ្ធសឹងតែមានអំណាចផ្នែកនយោបាយ និងហិរញ្ញវត្ថុ ដែល WHO ត្រូវការ ដើម្បីបញ្ចប់ជំងឺរាតត្បាតនេះ ដោយលោក បាននិយាយថា ផែនការនេះអាចជួយសង្គ្រោះជីវិតមនុស្សបាន ៥ លាននាក់។
បើតាម លោក Carl Bildt ជាបេសកជនពិសេសរបស់អង្គការសុខាភាពពិភពលោក WHO ប្រចាំអង្គការ ACT-Accelerator បាននិយាយថា សំណើនេះគឺមានតម្លៃ ២៣.៤ ពាន់លានដុល្លារ។ លោកបញ្ជាក់ថា នេះជាចំនួនដ៏សមរម្យមួយ ប៉ុន្តែប្រសិនបើអ្នកប្រៀបធៀបជាមួយនឹងការខូចខាតចំពោះសេដ្ឋកិច្ចពិភពលោក ដោយជំងឺរាតត្បាតនេះ វាពិតជាមិនច្រើននោះទេ។
ដោយឡែក បើតាមប្រធានផ្នែកវិទ្យាសាស្ត្រ WHO លោកស្រី Soumya Swaminathan បានឲ្យដឹងថា គម្រោង COVAX ដែលផ្តោតលើការចែកចាយវ៉ាក់សាំងរបស់អង្គការ ACT-A បានចែកចាយវ៉ាក់សាំងការពារជំងឺកូវីដ-១៩ ប្រហែលជា៤០០លានដូសដល់ប្រទេសចំណូលទាប និងជាមធ្យមជាង១៤០នៅទូទាំងពិភពលោក ដែលចំនួននេះមានកម្រិតទាបនៅឡើយ៕