WHO ទទួលស្គាល់វ៉ាក់សាំងការពារកូវីដ Covaxin របស់ឥណ្ឌាជាផ្លូវការ
ញ៉ូវយ៉ក ៖ អង្គការសុខភាពពិភពលោក (WHO) បានឲ្យដឹង កាលពីថ្ងៃពុធថា ខ្លួនបានអនុម័តឲ្យប្រើប្រាស់សម្រាប់វ៉ាក់សាំងការពារជំងឺកូវីដ ១៩ របស់ក្រុមហ៊ុនឥណ្ឌា Bharat Biotech ក្នុងករណីបន្ទាន់។
ការចុះបញ្ជីប្រើប្រាស់បន្ទាន់នឹងត្រូវអនុញ្ញាតឲ្យក្រុមហ៊ុន Bharat Biotech នាំចេញនូវវ៉ាក់សាំងរបស់ខ្លួនដែលគេស្គាល់ថា Covaxin ទៅកាន់ប្រទេសក្រីក្រ និងប្រទេសខ្វះខាតវ៉ាក់សាំងផ្សេងៗទៀត ដោយគោរពតាមសេចក្តីណែនាំរបស់ WHO សម្រាប់ការអនុម័ត។
WHO និងក្រុមទីប្រឹក្សាបច្ចេកទេសរបស់ខ្លួន បានបញ្ជាក់ថា វ៉ាក់សាំង Covaxin នេះមានអត្ថប្រយោជន៍ច្រើន ជាងហានិភ័យរបស់វា ហើយ វ៉ាក់សាំងនេះត្រូវតាមលក្ខណៈស្តង់ដាររបស់ WHO ក្នុងការការពារជំងឺកូវីដ-១៩ ផងដែរ។
គួរបញ្ជាក់ថា វ៉ាក់សាំងការពារជំងឺកូវីដ ១៩ របស់ប្រទេសឥណ្ឌា Covaxin នេះបានក្លាយជាវ៉ាក់សាំងទី ៧ ដែលត្រូវបានទទួលស្គាល់ជាផ្លូវការពី WHO បន្ទាប់ពីវ៉ា់ក់សាំង Pfizer, Moderna, AstraZeneca, Johnson & Johnson, Sinovac និង Sinopharm៕