រុស្ស៉ីនឹងធ្វើតេស្តវ៉ាក់សាំងបង្ការកូវីដ-១៩ «Sputnik V» ជាប្រភេទស្ព្រាយបាញ់ច្រមុះ
ម៉ូស្គូ ៖ រុស្ស៊ីនឹងធ្វើតេស្ដវ៉ាក់សាំងបង្ការ COVID-19 ឈ្មោះ Sputnik V របស់ខ្លួននៅក្រោមទម្រង់ជា «វ៉ាក់សាំងស្ព្រាយបាញ់ច្រមុះ» លើក្រុមអ្នកស្ម័គ្រចិត្ត ខណៈលោកប្រធានាធិបតី វ៉្លាឌីមៀ ពូទីន ទើបបានអំពាវនាវឱ្យបង្កើនល្បឿន នៃយុទ្ធនាការចាក់វ៉ាក់សាំង នៅក្នុងប្រទេសដែលមានប្រជាជនជាង១៤០លាននាក់មួយនេះ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃពុធ ទី១៣ ខែតុលា ឆ្នាំ២០២១។
យោងតាមឯកសារដែលបានចុះផ្សាយនៅលើបញ្ជីឱសថរបស់រដ្ឋបានបង្ហាញថា វ៉ាក់សាំងបាញ់តាមច្រមុះត្រូវប្រើពីរដូសនៅក្នុងគ្លីនិកមួយក្នុងទីក្រុង St Petersburg ប៉ុន្តែមិនបានបញ្ជាក់ច្បាស់ពីកាលបរិច្ឆេទនៃការធ្វើតេស្តឡើយ។ រុស្ស៊ីបានផលិតវ៉ាក់សាំង Sputnik របស់ខ្លួនបានយ៉ាងលឿននៅពេលកូវីដបានផ្ទុះឡើងកាលពីឆ្នាំមុន ប៉ុន្តែការទប់ស្កាត់មិនទាន់ល្អប្រសើរឡើយ ស្របពេលអាជ្ញាធរទីក្រុងជាច្រើនកំពុងមានការព្រួយបារម្ភពីផលិតផលថ្មីរបស់ខ្លួន។
ប្រធានាធិបតី វ្ល៉ាឌី មៀរពូទីន បាននិយាយកាលពីថ្ងៃអង្គារ ថាប្រទេសរុស្ស៊ីត្រូវការពន្លឿនយុទ្ធនាការចាក់វ៉ាក់សាំងប្រឆាំងជំងឺកូវីដ -១៩ ខណៈប្រទេសនេះបានកត់ត្រាចំនួនអ្នកស្លាប់តែមួយថ្ងៃខ្ពស់បំផុតចាប់តាំងពីការផ្ទុះឡើងនៃជំងឺរាតត្បាតសកល។
អាជ្ញាធររុស្ស៊ីបាននិយាយកាលពីខែមិថុនាថា វ៉ាក់សាំងប្រភេទបាញ់ច្រមុះដែលសមស្របសម្រាប់កុមារអាយុពី ៨ ទៅ ១២ ឆ្នាំត្រូវបានសាកល្បង ហើយផែនការនឹងដាក់ឲ្យដំណើរការផលិតផលនៅខែកញ្ញា៕