ស្ថានីយផ្លូវល្បឿនលឿន និងឡានក្រុងនៅភាគឦសានប្រទេសចិនត្រូវបានបិទដោយសារព្យុះព្រិល
ប៉េកាំង ៖ ប្រព័ន្ធផ្សព្វផ្សាយរដ្ឋរបស់ប្រទេសចិនបានរាយការណ៍ កាលពីថ្ងៃពុធថា ព្យុះព្រិលបានបង្កឲ្យមានការបំផ្លិចបំផ្លាញនៅផ្នែកភាគឦសានប្រទេសចិន នៅសប្តាហ៍នេះ ដែលជាការធ្លាក់ព្រិលមិនធ្លាប់មាននៅផ្នែកខ្លះ ធ្វើឲ្យកកស្ទះចរាចរណ៍ រំខានដល់សេវាកម្មរថភ្លើង និងបង្កើនការព្រួយបារម្ភអំពីការផ្គត់ផ្គង់ថាមពលអគ្គិសនីជាដើម ខណៈដែលសីតុណ្ហភាពកាន់តែត្រជាក់ខ្លាំងឡើងៗ។
ចរាចរណ៍នៅក្នុងខេត្ត Liaoning ត្រូវបានរំខានយ៉ាងធ្ងន់ធ្ងរ ខណៈស្ថានីយផ្លូវល្បឿនលឿនភាគច្រើនបានបិទ រួមទាំងស្ថានីយរថភ្លើង និងឡានក្រុងក៏ត្រូវបានបិទដូចគ្នា លើកលែងតែទីក្រុង Dalian និងទីក្រុង Dandong ប៉ុណ្ណោះ។ ទន្ទឹមនោះ នាយកដ្ឋានឧតុនិយមនៅខេត្ត Liaoning និងខេត្ត Jilin បានចេញសេចក្ដីប្រកាសអាសន្នផងដែរសម្រាប់ព្យុះព្រិលនេះ ដែលមានកម្រិតធ្ងន់ធ្ងរបំផុត។
ដោយឡែក នៅក្នុងទីក្រុង Shenyang ដែលរងគ្រោះដោយព្រិលធ្លាក់ដែរនោះ អាជ្ញាធរបានជំរុញឲ្យផ្សារ និងហាងលក់គ្រឿងទេសឲ្យបញ្ចុះតម្លៃបន្លែមួយចំនួន ដើម្បីបង្កើនការផ្គត់ផ្គង់ដល់ប្រជាជនក្នុងទីក្រុង៕