Hun Sen Cup ថ្នាក់ជាតិ រកឃើញបេក្ខភាព៤ក្រុមឡើងវគ្គពាក់កណ្តាលផ្តាច់ព្រ័ត្រហើយ
ភ្នំពេញ ៖ ការប្រកួតបាល់ទាត់ដណ្ដើមពានរង្វាន់សម្ដេចអគ្គមហាសេនាបតីតេជោ ហ៊ុន សែន ឬពាន Hun Sen Cup លើកទី១៥ (ថ្នាក់ជាតិ) ឆ្នាំ២០២១ បានរកឃើញបេក្ខភាព៤ក្រុមឡើងវគ្គពាក់កណ្តាលផ្តាច់ព្រ័ត្រហើយដោយរួមមាន ក្រុមបាល់ទាត់បឹងកេត វិសាខា ព្រះខ័នរាជស្វាយរៀង និងក្រុមភ្នំពេញក្រោន។
មុនឡើងមកវគ្គនេះ ក្រុមបឹងកេត បានឈ្នះលើណាហ្គាវើល៏ ដោយបាល់កាត់ក្ដី១១ម៉ែត្រលទ្ធផល ៧-៨ បន្ទាប់ពី៩០នាទីក្រុមទាំងពីរស្មើគ្នា ២-២ ខណៈវិសាខា បានយកឈ្នះ អាស៊ីអឺរ៉ុបយូណាយធីត ៦-០។ ចំណែក ព្រះខ័នរាជស្វាយរៀង យកឈ្នះអង្គរថាយហ្គឺរ ៣-០ គ្រាដែលភ្នំពេញក្រោន យកឈ្នះ អគ្គីសនីកម្ពុជា ១-០។
សម្រាប់ជំនួបវគ្គពាក់កណ្តាលផ្តាច់ព្រ័ត្រនឹងធ្វើឡើងនៅថ្ងៃទី២៤ ខែវិច្ឆិកា ដោយ បឹងកេត ប៉ះ វិសាខា ខណៈព្រះខ័នរាជស្វាយរៀង ជួប ភ្នំពេញក្រោន។ ដោយឡែកការប្រកួតវគ្គផ្តាច់ព្រ័ត្រនឹងធ្វើឡើងនៅថ្ងៃទី២៥ ខែវិច្ឆិកា ឆ្នាំ២០២១៕