Aguero សម្រេចចិត្ត​ចូលនិវត្តន៍​ពី​វិស័យ​បាល់ទាត់​ ដោយសារ​បញ្ហា​បេះដូង​

បរទេស ៖ ខ្សែប្រយុទ្ធ Sergio Aguero របស់​ក្លឹប​អ្នកមាន​បុណ្យ Barcelona ត្រូវបាន​គេ​រាយការណ៍​ថា បាន​សម្រេចចិត្ត​ចូលនិវត្តន៍​ពី​វិស័យ​បាល់ទាត់​ហើយ ដោយសារតែ​គាត់​មាន​បញ្ហា​ជំងឺ​បេះដូង​។​

​កីឡាករ​សញ្ជាតិ​អា​ហ្ស​ង់​ទីន​រូបនេះ​បាន​ឈឺ​ដើមទ្រូង​និង​ដង្ហើម​ខ្លី​ក្នុង​ការប្រកួត La Liga របស់​ក្រុម​របស់គាត់​ជាមួយ Alaves កាលពី​ខែ​មុន ហើយ​ដំបូង​ឡើយ​ត្រូវបាន​គេ​រាយការណ៍​ថា​នឹងត្រូវ​សម្រាក​ព្យាបាល​រយៈពេល ៣​ខែ​បន្ទាប់ពី​ការពិនិត្យ​បេះដូង​រួច​។​

Aguero មិនត្រូវ​បាន​គេ​ជឿថា​នឹង​ពិចារណា​ចូលនិវត្តន៍​ក្នុងនាម​ជា​កីឡាករ​អាជីព​នោះទេ ប៉ុន្តែ​ឥឡូវ​អតីត​ខ្សែប្រយុទ្ធ Manchester City បាន​សម្រេចចិត្ត​ចូលនិវត្តន៍​ពី​វិស័យ​បាល់ទាត់​ហើយ ដោយសារ​បញ្ហា​សុខភាព​របស់គេ​។​

​យោងតាម​អ្នកកាសែត Gerard Romero បាន​ឲ្យ​ដឹងថា​ការចូលនិវត្តន៍​របស់ Aguero នឹងត្រូវ​បានប្រកាស​ជា​ផ្លូវការ​នៅ​សប្តាហ៍​ក្រោយ ខណៈ​ការសរសេរ​នៅលើ Twitter ថា “Kun Aguero ចូលនិវត្តន៍​។ បញ្ហា​បេះដូង​បង្ខំ​ឱ្យ​គាត់​ចាក​ចេញពី​បាល់ទាត់​។ នៅ​សប្តាហ៍​ក្រោយ សន្និសីទ​សារព័ត៌មាន​មួយ​គ្រោង​នឹង​ប្រកាស​ពី​ការដកខ្លួន​របស់គាត់​” ។​

​សូមជម្រាបថា Aguero បង្ហាញខ្លួន​បានតែ ៥​ប្រកួត​ប៉ុណ្ណោះ​សម្រាប់ Barcelona នៅ​រដូវ​កាល​នេះ ដោយសារតែ​របួស​កំភួន​ជើង មុននឹង​ចូលនិវត្តន៍​ដោយ​ស៊ុត​បញ្ចូល​ទី​បានតែ​១​គ្រាប់​ប៉ុណ្ណោះ​សម្រាប់ Barca ក្នុងការ​ប្រកួត El Clasico ក្រោយ​ចាក​ចេញពី Manchester City ៕