ស៊ីដនី ៖ ប្រមុខរដ្ឋាភិបាលនៃរដ្ឋ New South Wales លោក Dominic Perrottet នៅថ្ងៃសុក្រនេះបាននិយាយថា ទីក្រុងស៊ីដនីនឹងបញ្ចប់វិធានការធ្វើចត្តាឡីស័កសម្រាប់អ្នកដំណើរអន្តរជាតិដែលបានទទួលការចាក់វ៉ាក់សាំងបង្ការជំងឺ COVID-19 ពេញលេញ (ចំនួន០២ដូស) ចាប់ពីថ្ងៃទី០១ ខែវិច្ឆិកាខាងមុខនេះតទៅ ដោយបង្ហាញពីការវិលត្រឡប់ពេញលេញនៃការធ្វើដំណើរទៅ-មកក្រៅប្រទេស បន្ទាប់ពីការបិទព្រំដែនអន្តរជាតិរបស់ខ្លួន អស់រយៈពេលជាង ១៩ខែ។ នេះបើយោងតាមការចេញផ្សាយដោយសារព័ត៌មាន Reuters នៅថ្ងៃសុក្រ ទី១៥ ខែតុលា ឆ្នាំ២០២១។

ប្រទេស​អូស្ត្រាលី​បាន​បិទ​ច្រកព្រំដែន​អន្តរជាតិ​របស់ខ្លួន​តាំងពីមីនា ឆ្នាំ​២០២០ មកម្ល៉េះ ដើម្បី​ទប់ស្កាត់​ការឆ្លង​រីក​រាលដាល​នៃ​ជំងឺ​កូ​វីដ​-១៩ ​ដែល​អនុញ្ញាត​ភាគច្រើន​តែ​ពលរដ្ឋ​របស់ខ្លួន និង​អ្នកស្នាក់នៅ​អចិន្ត្រៃយ៍​ប៉ុណ្ណោះ ប៉ុន្តែ​ទាមទារ​ធ្វើ​ច​ត្តា​ឡី​ស័ក​រយៈពេល២សប្តាហ៍​នៅ​សណ្ឋាគារ​ដែល​បានរៀបចំ​ទុក​ដោយ​រដ្ឋាភិបាល​។​

លោក Perrottet បាន​ប្រាប់​អ្នកកាសែត​ថា យើង​ចង់​ឲ្យ​ប្រទេស​របស់​យើង​វិល​មក​សភាព​ធម្មតា​វិញ​។ យើង​កំពុង​ព្យាយាម​ចាត់វិធានការ​ក្នុងការ​សង្គ្រោះ​ប្រទេស​ឲ្យ​ចេញ​ផុតពី​វិបត្តិ​កូ​វីដ ១៩ នេះ​។ ហើយ​យើង​នឹង​បើក​ទីក្រុង​ស៊ីដនី និង​ទីរដ្ឋ​ New South Wales ឡើងវិញ​។​

គួរ​បញ្ជាក់ថា រដ្ឋ​ New South Wales ត្រូវបាន​គេ​រំពឹងថា ការចាក់​វ៉ាក់សាំង​ពេញលេញ​ដល់​ទៅ ៨០ ភាគរយ សម្រាប់​មនុស្ស​ធំ​ត្រឹម​ចុង​សប្តាហ៍​នេះ ខណៈដែល​ប្រទេស​ទាំងមូល​ត្រូវការ​យ៉ាងហោចណាស់ ២ សប្តាហ៍​ទៀត ដើម្បី​ឈានដល់​អត្រា​នេះ​៕