ក្មេងប្រុស ៤៩នាក់លង់ទឹកស្លាប់ ក្នុងឧបទ្ទវហេតុលិចទូកនៅប៉ាគីស្ថាន

អ៊ីស្លាម៉ាបាដ៖ ប៉ូលិសប៉ាគីស្ថាន បានឲ្យដឹងនៅថ្ងៃអង្គារសប្តាហ៍នេះថា ក្មេងៗចំនួន ៤៩នាក់បានលង់ទឹកស្លាប់ នៅពេលដែលទូកមួយគ្រឿងផ្ទុកមនុស្សលើសទម្ងន់ បានក្រឡាប់លិចនៅភាគពាយព្យប្រទេស បន្ទាប់ពីក្រុមអ្នកមុជទឹកចំណាយពេល ៣ថ្ងៃទើបអាចស្រង់សាកសពទាំងអស់ចេញពីទឹក។

លោក ខទៀត អះម៉ាត់ (Khateer Ahmad) ជាមន្ត្រីជាន់ខ្ពស់នៃក្រុមសង្រ្គោះ Rescue 1122 បាននិយាយថា ក្មេងប្រុសដែលមានអាយុចន្លោះពី ៧ ទៅ១៤ឆ្នាំសុទ្ធតែជាសិស្សនៃសាលាបឋមសិក្សាមួយ ហើយពួកគេត្រូវបាននាំទៅលេងកម្សាន្តនៅឯបឹងធម្មជាតិតាន់ដា ដាំ Tanda Dam កាលពីថ្ងៃអាទិត្យ សប្តាហ៍មុន។ លោកបញ្ជាក់ថា ដោយសារទឹកនៅបាតបឹងមានសភាពត្រជាក់ បានរារាំងដល់ បេសកកម្មជួយសង្គ្រោះ។ ប៉ុន្តែថ្ងៃនេះ (ថ្ងៃអង្គារសប្ដាហ៍នេះ) ក្រុមសង្រ្គោះអាចមុជទឹកបានជ្រៅដើម្បីស្រង់សាកសពដែលនៅសេសសល់។ សាកសពគ្រូបង្រៀនម្នាក់ និងម្ចាស់ទូកក៏ត្រូវបាន ស្រង់ចេញពីទឹកដែរ ធ្វើឲ្យចំនួនអ្នកស្លាប់កើនដល់ ៥១នាក់។

អ្នកនាំពាក្យប៉ូលិសថា ទូកខាងលើនេះផ្ទុកលើសទម្ងន់ ដោយវាអាចដាក់មនុស្សបានប្រហែល២០ ទៅ២៥នាក់ប៉ុណ្ណោះ។

សូមជម្រាបថា បឹងធម្មជាតិ Tanda Dam មានចម្ងាយប្រហែល ៥គីឡូម៉ែត្រពីសាលាបឋមសិក្សា ដែលជាសាលាអ៊ីស្លាមផ្តល់ការអប់រំផ្នែកសាសនា ដោយឥតគិតថ្លៃនៅក្នុងទីក្រុង កូហាត (Kohat) ខេត្តខាយបឺ ប៉ាទុនវ៉ា (Khyber Pakhtunkhwa)៕