គ្រូ​ម៉ាឡេស៊ី បង្ហាញ​ក្ដីបារម្ភ​ចំពោះ​វត្តមាន ​ចាន់ វឌ្ឍនាកា​ មុន​ប៉ះ​កម្ពុជា​សប្ដាហ៍​ក្រោយ​

បរទេស ​៖ គ្រូបង្វឹក​ក្រុម​ជម្រើសជាតិ​ម៉ាឡេស៊ី បានបង្ហាញ​ក្ដី​ព្រួយបារម្ភ​មួយចំនួន​មុន​ប៉ះ​ជាមួយ​ក្រុម​ជម្រើសជាតិ​កម្ពុជា​នៅ​សប្ដាហ៍​ក្រោយនេះ ពោលគឺ​នៅ​ថ្ងៃទី៦ ខែធ្នូ ខាងមុខនេះ​។​

គ្រូបង្វឹក​ក្រុម​ជម្រើសជាតិ​ម៉ាឡេស៊ី បាន​និយាយថា យើង​ព្រួយបារម្ភ​ចំពោះ​កត្តា​ឧស្សាហ៍​ព្យាយាម​ក្នុង​ការលេង​របស់​ពួកគេ និង​ការតស៊ូ​លេង​ពេញ​តង់ មិន​ចុះចាញ់​របស់​ពួកគេ​ផងដែរ​។​ ទន្ទឹម​នោះ លោក ក៏​មើលឃើញថា ទាំង​វត្តមាន​ខ្សែប្រយុទ្ធ​ជំនាញ​ជើងឆ្វេង ចាន់ វឌ្ឍនាកា ដែល​ធ្លាប់មាន​បទពិសោធន៍ លេង​នៅ​លី​គ​ម៉ាឡេស៊ី និង​អ្នកចាត់ការ​ក្រុម​ ជនជាតិ​ជប៉ុន ​លោក Keisuke Honda ផង​នោះ ដោយ​និយាយថា ពួកគេ​នឹងមិន​ងាយស្រួល​ក្នុង​ការលេង​ទល់នឹង​ក្រុម​កម្ពុជា​នោះឡើយ សម្រាប់​ការប្រកួត​បើកឆាក​ក្នុង​ពានរង្វាន់ AFF SUZUKI CUP 2020 ដែល​ធ្វើឡើង​នៅ​ប្រទេស​សិង្ហ​បុរី​។

សូមជម្រាបថា ក្រុម​ជម្រើសជាតិ​ម៉ាឡេស៊ី​ស្ថិតនៅក្នុង​ពូ​ល B ជាមួយ​ក្រុម​ជម្រើសជាតិ កម្ពុជា ឥណ្ឌូនេស៊ី ឡាវ និង​វៀតណាម​៕