អភិបាលខេត្តបន្ទាយមានជ័យ ដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្តដើម្បីអនុវត្តវិធានទប់ស្កាត់ការកាប់ព្រៃលិចទឹក និងវាទទីយកដីបឹងទន្លេសាប

ខេត្តបន្ទាយមានជ័យ ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងជាប្រធានគណៈបញ្ជាការឯកភាពរដ្ឋបាលខេត្ត នាព្រឹកថ្ងៃចន្ទទី២៩ ខែវិច្ឆិកា ឆ្នាំ២០២១ បានអញ្ជើញដឹកនាំកិច្ចប្រជុំអនុវត្តន៍វិធានការទប់ស្កាត់ និងបង្រ្កាបជាបន្ទាន់ចំពោះការកាប់ព្រៃលិចទឹក និងវាទទីយកដីបឹងទន្លេសាប ស្ថិតក្នុងភូមិសាស្រ្តខេត្តបន្ទាយមានជ័យ តាមបទបញ្ជាដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

ក្នុងកិច្ចប្រជុំនេះរៀបចំឡើងនៅសាលាខេត្ត ដោយមានវត្តមានអញ្ជើញពី លោកអភិបាលរងខេត្ត មេបញ្ជាការកងរាជអាវុធហត្ថខេត្ត ស្នងការនគរបាលខេត្ត មេបញ្ជាការសឹងរងខេត្ត មេបញ្ជាការកងពលតូចថ្មើរជើងលេខ៥១ អភិបាលស្រុកពាក់ព័ន្ធ មន្ទីរ អង្គភាពពាក់ព័ន្ធជុំវិញខេត្ត។

កិច្ចប្រជុំនេះធ្វើឡើងជាបន្ទាន់ក្រោយពីទទួលបានបទបញ្ជាការរបស់សម្តេចតេជោ ហ៊ុន សែន ប្រមុខរាជរដ្ឋាភិបាល ដើម្បីអនុវត្តន៍ឲ្យមានប្រសិទ្ធិភាព គឺរដ្ឋបាលខេត្តបើកការប្រជុំដើម្បីប្រមូលព័ត៌មាន ឯកសារពាក់ព័ន្ធនានា ជាមុន ដើម្បីចុះទៅពិនិត្យទប់ស្កាត់ជាមួយក្រុមការងារចម្រុះថ្នាក់ជាតិនៅទីតាំងជាក់ស្តែង។

ក្នុងនាមគណៈបញ្ជាការឯកភាពរដ្ឋបាលខេត្តបានត្រៀមកម្លាំងសរុប មធ្យោបាយសរុប ដើម្បីចូលរួមអនុវត្តន៍ និងទប់ស្កាត់ការរុករានទន្ទ្រានដីផ្ទៃបឹងទន្លេសាបក្នុងដែនដីភូមិសាស្ត្រខេត្តបន្ទាយមានជ័យនេះ អោយបានល្អ និងឆ្លើយតបទៅនឹងការដាក់បទបញ្ជាយ៉ាងមឹងម៉ាត់របស់សម្តេចតេជោ៕ ដោយ ៖ កំសត់