ស្ថានភាពនៃការតវ៉ានៅបារាំងធ្លាក់ចូលក្នុងដំណាក់កាលដែលមិនអាចគ្រប់គ្រងបាន
ប៉ារីស៖ អាជ្ញាធរបារាំងបានតស៊ូកាលបង្ក្រាបការតវ៉ាប្រឆាំងនឹងកំណែទម្រង់ប្រាក់សោធននិវត្តន៍របស់ប្រធានាធិបតី Emmanuel Macron ។ បាតុករជាងមួយលាននាក់បានដើរតាមដងផ្លូវទូទាំងប្រទេសក្នុងអ្វីដែលប្រភពសន្តិសុខមួយចំនួនពណ៌នាថាជា “ការបះបោរ” ប្រឆាំងនឹងរដ្ឋាភិបាលក្នុងទីក្រុងប៉ារីស ហើយធ្លាក់ក្នុងដំណាក់កាលដែលមិនអាចគ្រប់គ្រងបាន។
គួររម្លឹកថា មកដល់ពេលនេះមាន កម្មកររាប់លាននាក់បានធ្វើកូដកម្ម ហើយបាតុករបានបិទការដឹកជញ្ជូនសាធារណៈ សាលារៀន និងរោងចក្រចម្រាញ់ប្រេងនិងទីតាំងសំខាន់ៗមួយចំនួនទៀត។ ក្នុងការប៉ុនប៉ងបំបែកការតវ៉ា ប៉ូលិសបានប្រើឧស្ម័នបង្ហូរទឹកភ្នែក កាណុងបាញ់ទឹក និងដំបង។ នៅក្នុង វីដេអូដែលធ្វើឡើងជុំគ្នានៅលើប្រព័ន្ធផ្សព្វផ្សាយសង្គមបានបង្ហាញពីមន្ត្រីយោធានិងរថពាសដែកយ៉ាងច្រើនកំពុងពទ្ធ័និងបង្ក្រាបក្រុមបាតុករដែលគ្មានអាវុធ។
ចំណែកវីដេអូផ្សេងទៀតបានបង្ហាញពីរនាំងដែលកំពុងឆេះនៅតាមដងផ្លូវក្នុងទីក្រុងប៉ារីស។ ច្រកចូលសាលាក្រុងក្នុងទីក្រុង Bordeaux ដែលជារដ្ឋធានីក្នុងតំបន់នៃ Nouvelle-Aquitaine ត្រូវបានដុតបំផ្លាញនៅចំណុចមួយ ខណដែលក្រុមបាតុករបានបង្ហាញនូវកំហឹងពុះពោរ។
តាមពត៌មានដែលបានផ្សព្វផ្សាយ យ៉ាងហោចណាស់ក៏មានក្រុមអ្នកពន្លត់អគ្គិភ័យមួយក្រុមបានប្តូរជំហររបស់ពួកគេ ហើយមកចូលរួមជាមួយបាតុករថែមទៀត។ សាក្សីជាច្រើននាក់បានពណ៌នាអំពីស្ថានភាពនេះថា អាជ្ញាធរប្រហែលជាអស់សមត្ថភាពក្នុងការគ្រប់គ្រងក្រុមបាតុករ។ ទន្ទឹមនោះក៏មានការលើកទ្បើងថា នោះជាការផ្ទុះសង្គ្រាមនៅទីក្រុងប៉ារីស ព្រោះវានឹងឈានដល់ការបង្ហូរឈាម បើគ្មានដំណោះស្រាយដោយសន្តិវិធី។
រដ្ឋមន្ត្រីមហាផ្ទៃបារាំងលោក Garald Darmanin បាននិយាយកាលពីល្ងាចថ្ងៃព្រហស្បតិ៍ម្សិលមិញថា មន្ត្រីប៉ូលិស និងអាវុធហត្ថជិត ១៥០នាក់បានរងរបួស ខណដែលលោកបានហៅទង្វើនេះថា “មិនអាចទទួលយកបាន” និងទាមទារឱ្យមានការផ្តន្ទាទោសយ៉ាងធ្ងន់ធ្ងរចំពោះអ្នកវាយប្រហារ។
លោក Darmanin ក៏បានប្រាប់អ្នកសារព័ត៌មានថា មនុស្ស ១៧២ នាក់ត្រូវបានចាប់ឃុំខ្លួន ដើម្បីសាកសួរអំពី “ការលួច និងដុត” នៅទីក្រុងប៉ារីស ហើយភ្លើងបានឆាបឆេះនូវ ១៩០ ទីតាំងនៅក្នុងរដ្ឋធានីរបស់ប្រទេសបារាំង ដែលដុតដោយក្រុមបាតុករ ។លោកថា មកដល់ពេលនេះទីតាំងចំនួន ៥០ កន្លែងនៅតែឆេះនៅទ្បើយ។
រដ្ឋមន្ត្រីក្រសួងមហាផ្ទៃបានស្តីបន្ទោសជនអនាធិបតេយ្យ “ឆ្វេងជ្រុល”និយម និង“ប្លុកខ្មៅ” ជាក្រុមបង្ករអំពើហឹង្សាដ៏អាក្រក់បំផុតនាពេលនេះ។ ទន្ទឹមនោះមន្ត្រីប៉ូលិសក៏បានប៉ាន់ប្រមាណថា មានបាតុករយ៉ាងតិចជាងមួយលាននាក់កំពង់ស្ថិតនៅតាមដងផ្លូវ។
សូមជម្រាបថា ការផ្ទុះឡើងនៃការមិនពេញចិត្ត ត្រូវបានបង្កឡើងដោយការប្រកាសរបស់លោកប្រធានាធិបតី Macron ដែលថាអាយុចូលនិវត្តន៍នឹងត្រូវលើកឡើងពីអាយុ ៦២ ទៅ ៦៤ ឆ្នាំដោយចាប់ផ្តើមនៅឆ្នាំក្រោយ។ លោក Macron ក៏បានទទូចថាការផ្លាស់ប្តូរនេះគឺចាំបាច់ បើមិនដូច្នេះទេប្រព័ន្ធសោធននិវត្តន៍នឹងក្ស័យធនក្នុងរយៈពេលប៉ុន្មានឆ្នាំខាងមុខ៕