ឥណ្ឌាបើកទទួលភ្ញៀវទេសចរដែលចាក់វ៉ាក់សាំងការពារជំងឺកូវីដ១៩គ្រប់ដូស ខណៈករណីឆ្លងធ្លាក់ចុះ
ឥណ្ឌា ៖ ប្រទេសឥណ្ឌាបើកដំណើរការឡើងវិញក្នុងការទទួលភ្ញៀវទេសចរណ៍បរទេស ដែលចាក់វ៉ាក់សាំងការពារជំងឺកូវីដ១៩ បានពេញលេញ ដោយក្នុងការបន្ធូរបន្ថយវិធានការរឹតត្បិត ខណៈដែលករណីឆ្លងនៅក្នុងប្រទេសប៉ុន្មានសប្ដាហ៍ចុងក្រោយនេះ មានការធ្លាក់ចុះគួរឲ្យកត់សម្គាល់។
ការសម្រេចចិត្តនេះត្រូវបានប្រកាស កាលពីដើមខែនេះ ដោយក្រសួងមហាផ្ទៃឥណ្ឌា ស្របពេលដែលការឆ្លងប្រចាំថ្ងៃរបស់ប្រទេសនេះបានធ្លាក់ចុះក្រោម ២០.០០០ នាក់ពីកម្រិតខ្ពស់បំផុតចំនួន ៤០០.០០០ នាក់នៅក្នុងខែ ឧសភា ហើយប្រជាជនភាគច្រើនទទួលការចាក់វ៉ាក់សាំងបានពេញលេញ
រដ្ឋមន្ត្រីក្រសួងទេសចរណ៍ឥណ្ឌា បាននិយាយ កាលពីថ្ងៃសុក្រថា ភ្ញៀវទេសចរបរទេសដែលធ្វើដំណើរតាមរយៈជើងហោះហើរឥណ្ឌាទាំងអស់ អាចចូលមកក្នុងប្រទេសឥណ្ឌាបាន ចាប់ពីថ្ងៃទី ១៥ ខែវិច្ឆិកា ខាងមុខនេះ។
នេះជាលើកដំបូងហើយ ដែលប្រទេសឥណ្ឌាបានអនុញ្ញាតឱ្យភ្ញៀវទេសចរណ៍បរទេសអាចចូលមកក្នុងប្រទេសបាន ចាប់តាំងពីខែ មីនា ឆ្នាំ ២០២០ នៅពេលដែលប្រទេសនេះបានដាក់ចេញនូវវិធានការបិទប្រទេសជាលើកដំបូង ដោយសារការឆ្លងរីករាលដាលនៃជំងឺកូវីដ ១៩ បានផ្ទុះឡើងខ្លាំងក្នុងប្រទេស។ វានៅមិនទាន់ច្បាស់ទេថាតើភ្ញៀវទេសចរណ៍ដែលមកដល់នឹងត្រូវធ្វើចត្តាឡីស័កឬយ៉ាងណា។ ប៉ុន្តែជាដំបូងពួកគេត្រូវការចាក់វ៉ាក់សាំងឱ្យបានពេញលេញ និងត្រូវធ្វើតេស្តរកមេរោគជាមុនសិន៕