កម្លាំងចម្រុះ​ចុះ​ទប់ស្កាត់​ការ​រុករាន​ទន្ទ្រាន​ដីព្រៃ​លិច​ទឹក តំបន់២ ​តំបន់​៣ ក្នុងភូមិ​សាស្ត្រ​ខេត្តបន្ទាយមានជ័យ

ខេត្តបន្ទាយមានជ័យ ៖ ឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានអញ្ជើញដឹកនាំមន្ត្រីជំនាញ មេបញ្ជាការ ស្នងការ កងកម្លាំងចម្រុះ ចុះពិនិត្យទីតាំងជាក់ស្តែង និងទប់ស្កាត់ការចំពោះការកាប់ព្រៃលិចទឹក និងវាទទីយកដីបឹងទន្លេសាប នៅតំបន់២ តំបន់៣ ក្នុងភូមិសាស្ត្រឃុំប្រាសាទ និង ភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ដោយប្រើប្រាស់មធ្យោបាយទូក ក្នុងថ្ងៃទី៣០ ខែវិច្ឆិកា ឆ្នាំ២០២១នេះ។

ក្នុងបេសកកម្មអញ្ជើញចុះពិនិត្យមើលស្ថានភាពជាក់ស្តែងនោះ ថ្នាក់ដឹកនាំក្រសួង អភិបាលខេត្ត បានរៀបចំកម្លាំងប្រដាប់អាវុធចម្រុះ មានមន្ត្រីខេត្ត មន្ត្រីជំនាញ កងកម្លាំងទាំង៣ ប្រចាំការជាប់នៅគោលដៅ ដើម្បីទប់ស្កាត់ បង្ក្រាប់បទល្មើស និង ក្រុមមន្ត្រីជំនាញសូរិយោដីខេត្ត មន្ត្រីជលផល និងមន្ត្រីស្រុក ឃុំមូលដ្ឋាន ដើម្បីចុះផ្ទៀងផ្ទាត់កំណត់បង្គោលព្រំ ដើម្បីកសាងឯកសារប័ណ្ណកម្ម ចុះបញ្ជីដីរដ្ឋ។

ឯកឧត្តម អ៊ុំ រាត្រី អភិបាលខេត្ត​មានប្រសាសន៍ថា ៖​ការចុះពិនិត្យ​ទប់ស្កាត់​ការ​រុករាន​ដីព្រៃ​លិច​តំបន់​បី​បឹង​ទន្លេសាប ភូមិសាស្ត្រ​ខេត្តបន្ទាយមានជ័យ ត្រូវបាន​បែងចែក​ជា​៣​ក្រុម ចុះ​ពិនិត្យ​៣​គោលដៅ​មាន​កម្លាំង​ជិត​៣០០​នាក់ មាន​កម្លាំង​នគរបាល កម្លាំង​កងទ័ព កម្លាំង​កងរាជអាវុធហត្ថ រួមទាំង​មន្ទីរជំនាញ​ស្ថាប័ន​ពាក់ព័ន្ធ​ទាំងអស់ ប្រើប្រាស់​កាណូត​ម៉ាស៊ីន​ចំនួន​៣០​គ្រឿង ចុះ​ពិនិត្យ​ក្នុងភូមិ​សាស្ត្រ​ព្រៃ​លិច​ទឹក​តំបន់​បី ដែល​នៅក្នុង​ភូមិសាស្ត្រ​ឃុំ​ភ្នំ​លៀប ,​ឃុំ​ប្រាសាទ ក្នុងស្រុក​ព្រះនេត្រព្រះ និង​ឃុំ​សំបួរ ក្នុងស្រុក​មង្គល​បូរី ហើយ​ដីព្រៃ​លិច​ទឹក​តំបន់​បី ភូមិ​សា​ស្គ្រ​ខេត្ត​បន្ទាយ​មាន​ផ្ទៃដី​ទំហំ​២២៣៥៨​ហិកតា (​ពីរម៉ឺន​ពីរពាន់​បី​រយ​ហាសិប​ប្រាំបី ហិកតា​)​ ដែលមាន​បង្គោល​ចំនួន​៤៦ មាន​បង្គោល​ថ្នាក់ជាតិ​ចំនួន​២៦​បង្គោល ថ្នាក់​ខេត្ត​២០​បង្គោល​។​

ឯកឧត្តម លាង មន្នី​រិ​ទ្ធ រដ្ឋលេខាធិការ​ក្រសួង​រៀបចំ​ដែនដី នគរូបនីយ៍កម្ម សំណង់​សូ​រិ​យោ​ដី​បាន​បញ្ជាក់ថា​៖ ជា​សារ​ណែនាំ​ពី​ស្តីពី​ការអនុវត្តន៍​បទបញ្ជា​របស់​សម្តេច​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ដើម្បី​មាន​វិធានការ​ទប់ស្កាត់​ការ​រុករាន​ទន្ទ្រាន​ដីព្រៃ​លិច​ទឹក​តំបន់ រដ្ឋបាលខេត្ត​បន្ទាយមានជ័យ​បាន​ចំ​គណៈកម្មការ​ដឹកនាំ​កម្លាំង​ទាំងបី​ស្ថាប័ន និង​មន្ត្រី​ស្ថាប័ន​ពាក់ព័ន្ធ​ចុះ​ពិនិត្យ​ផ្ទាល់ និង​កំណត់​បង្គោល​ព្រំដី​តំបន់​បី​ក្នុងភូមិ​សាស្ត្រ​ខេត្តបន្ទាយមានជ័យ​ហើយ​ចុះ​ស្រាវជ្រាវ​និង​កំណត់​មុខសញ្ញា​អោយបាន​ច្បាស់​និង​អនុវត្ត​អោយមាន​តម្លាភាព និង​ប្រសិទ្ធភាព​។

សូមរំលឹកថា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី២៨ ខែវិច្ឆិកា ឆ្នាំ២០២១ បានចេញបទបញ្ជាយ៉ាងម៉ឺងម៉ាត់មួយ ឱ្យក្រសួងស្ថាប័នពាក់ព័ន្ធ និងអភិបាលខេត្តជាប់បឹងទន្លេសាប ត្រូវធ្វើការទប់ស្កាត់ និងបង្រ្កាបជាបន្ទាន់ ចំពោះការលួចកាប់ព្រៃលិចទឹក និងវាទទីយកដីនៅតាមបឹងទន្លេសាប៕ ដោយ ៖ កំសត់