១០ខែឆ្នាំនេះ ស៊ីម៉ាក់កម្ទេចគ្រាប់មីនជិត៧ម៉ឺនគ្រាប់ រំដោះផ្ទៃដីរងផលប៉ះពាល់ដោយសារគ្រាប់មីនជាង ៨៣គីឡូម៉ែត្រក្រឡា
ភ្នំពេញ ៖ រយៈពេល១០ ខែឆ្នាំ២០២១នេះ មជ្ឈមណ្ឌលសកម្មភាពកម្ចាត់មីនកម្ពុជា ហៅស៊ីម៉ាក់ រកឃើញនិងកម្ទេចគ្រាប់មីនយុទ្ធភណ្ឌមិនទាន់ផ្ទុះគ្រប់ចំនួន ៦៩ ៩០៤ គ្រាប់ ដោយរំដោះផ្ទៃដីរងផលប៉ះពាល់ចំនួន ៨៣ ៤៤៦ ៣៥២ ម៉ែត្រក្រឡានៃផែនការប្រចាំឆ្នាំ។ របាយការណ៍នេះត្រូវបានឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់បង្ហោះលើទំព័រហ្វេសប៊ុករបស់ខ្លួន ក្រោយកិច្ចប្រជុំក្រុមប្រឹក្សាភិបាលស៊ីម៉ាក់នៅថ្ងៃទី៣០ ខែវិច្ឆិកា ឆ្នាំ២០២១។
បើតាមឯកឧត្តម ហេង រតនា លទ្ធផលការងារគ្រប់មុខព្រួញរបស់អង្គភាពស៊ីម៉ាក់ ចាប់ពីខែមករា ដល់ខែតុលា ឆ្នាំ២០២១កន្លងមក បានទទួលលទ្ធផលគួរជាទីកត់សម្គាល់ បើទោះជាស្ថិតក្នុងបរិបទសកលនៃការឆ្លងរាលដាលជំងឺកូវីដ-១៩ ក៏ដោយ។
ឯកឧត្តមបន្តថា លទ្ធផលដែលបានទទួលទាបជាងផែនការមួយផ្នែកដោយសារការចល័តក្រុមពហុជំនាញ ដែលមានស្រាប់ពីការបោសសម្អាតទៅធ្វើការស្រាវជ្រាវចម្ការមីន/គ្រាប់វិញ ហើយលទ្ធផលស្រាវជ្រាវកំណត់ចម្ការមីន/គ្រាប់ថ្មីសម្រេចបាន ៥១៤ទីតាំងស្មើនឹង ៨០ ៦៥០ ៨៣៩ ម៉ែត្រក្រឡា។
ក្រៅតែពីកិច្ចប្រតិបត្តិការរុករក កម្ទេចគ្រាប់មិនទាន់ផ្ទុះចោល មជ្ឈមណ្ឌលសកម្មភាពកម្ចាត់មីនកម្ពុជា ក៏មានការអប់រំពីចំណេះដឹងគ្រោះថ្នាក់ដោយសារគ្រាប់មីនដល់ប្រជាពលរដ្ឋដែរ។ ក្នុងរយៈពេលដូចគ្នានេះ ការងារផ្សព្វផ្សាយនិងអប់រំពីគ្រោះថ្នាក់ដោយសារគ្រាប់មីននិងសំណល់ជាតិផ្ទុះពីសង្គ្រាមដល់ពលរដ្ឋដែលជាក្រុមគោលដៅបានចំនួន ៧៨៦ ៩២៤ នាក់។
សម្រាប់ផែនការឆ្នាំ២០២២ គឺមានផែនការរំដោះផ្ទៃដី មានបញ្ហាគ្រាប់មីន និងសំណល់យុទ្ធភណ្ឌសង្គ្រាមចំនួនប្រមាណ ១២៥គីឡូម៉ែត្រក្រឡា និងបន្តពង្រឹងសមត្ថភាពជាតិ ក្នុងការដោះស្រាយវិបត្តិសំណល់គ្រាប់បែកចង្កោម និងសំណល់យុទ្ធភណ្ឌសង្គ្រាម ដើម្បីគាំទ្រសកម្មភាពមនុស្សធម៌ និងការអភិវឌ្ឍរបស់រាជរដ្ឋាភិបាល អនុលោមតាមផែនការជាតិ និងការប្តេជ្ញាចិត្តជាមួយសហគមន៍អន្តរជាតិ ស្តីពីសម្រេចឱ្យបានអនុសញ្ញាអន្តរជាតិអូតាវ៉ា ត្រឹមចុងឆ្នាំ២០២៥៕