ភ្នាក់ងារ​ចង់​ឲ្យ Ronaldo ចាក​ចេញពី Man Utd ទៅ​ចូលរួម​ជាមួយក្លិបយក្សនៅបារាំង​

មេនឆេស្ទើ ៖ ភ្នាក់ងារ Cristiano Ronaldo លោក Jorge Mendes ត្រូវបាន​គេ​រាយការណ៍​ថា ចង់​ឲ្យ​កូនក្រុម​ចាកចេញ​ពី Manchester United ទៅ​ចូលរួម​ជាមួយ Paris Saint-Germain ដើម្បី​ចាប់ដៃ​គូរ​ជាមួយ Lionel Messi​។

Ronaldo បានសម្រេច​ចិត្ត​ចាក​ចេញពី Juventus ដើម្បី​វិលត្រឡប់​មកកាន់​កីឡដ្ឋាន Old Trafford វិញ​ក្រោយ​ចែកផ្លូវ​គ្នា​ជាមួយ​ក្លិប​អស់​រយៈពេល​១២​ឆ្នាំ​ដែល​ពេល​នោះគេ​បាន​ផ្លាស់​ទៅកាន់ Real Madrid​។​

​កីឡាករ​វ័យ ៣៦ ឆ្នាំ​រូបនេះ​បានបង្ហាញ​ទម្រង់​លេង​យ៉ាង​លេចធ្លោ នៅពេល​ត្រលប់មក Man Utd វិញ​ដោយ​ស៊ុត​បញ្ចូល​ទី​បាន ១០ គ្រាប់​ក្នុងការ​បង្ហាញខ្លួន ១៥ ប្រកួត​សម្រាប់​ក្លិប បើទោះបីជា​បិសាច​ក្រហម​មិនសូវ​ទទួលបាន​ជ័យជម្នះ​ក៏ដោយ​។​

​ការមកដល់​របស់លោក Ralf Ragnick អាចមាន​ឥទ្ធិពល​យ៉ាងខ្លាំង​ទៅលើ​អនាគត​របស់ Ronaldo នៅ Man Utd ដោយសារ​ប្រព័ន្ធ​លេង​របស់លោក​។ អតីត​គ្រូបង្វឹក​របស់​ក្រុម RB Leipzig ត្រូវបាន​គេ​ស្គាល់​ថា​ជា​គ្រូ​ដែល​ចូលចិត្ត​ឲ្យ​កូនក្រុម​ដេញ​យក​បាល់​ពី​ក្រុម​គូប្រកួត​ជាពិសេស​នោះ​លោក​ចូលចិត្ត​រួមការ​ងារ​ជាមួយ​កីឡាករ​ក្មេងៗ​ពីព្រោះ​លោក​ជា​គ្រូ​ដែលមាន​ទស្សនៈ​វែងឆ្ងាយ​។​

​ដោយសារ​ហេតុ​ផង​ទាំងនេះ​ទើប​ភ្នាក់ងារ​របស់ Cristiano Ronaldo លោក Jorge Mendes ចង់​ឲ្យ​កូនក្រុម​ចាកចេញ​ពី ManUtd ។ យោងតាម​របាយការណ៍​ពី​គេហទំព័រ​របស់​អេ​ស្ប៉ា​ញ El Nacional ភ្នាក់ងារ​របស់​ខ្សែប្រយុទ្ធ​រូបនេះ​ចង់​ឲ្យ Ronaldo ទៅលេង​នៅ PSG ដើម្បី​ចាប់ដៃ​គូរ​ជាមួយ Lionel Messi ៕