មនុស្ស១៤នាក់ស្លាប់ និងច្រើននាក់ទៀតរបួសក្នុងហេតុការណ៍ផ្ទុះភ្នំភ្លើង Semeru នៅឥណ្ឌូនេស៊ី
ហ្សាការតា ៖ ទីភ្នាក់ងារគ្រោះមហន្តរាយជាតិរបស់ប្រទេសឥណ្ឌូណេស៊ីបានឲ្យដឹង កាលពីថ្ងៃអាទិត្យថា ការផ្ទុះភ្នំភ្លើង Semeru បានសម្លាប់មនុស្សយ៉ាងហោចណាស់១៤នាក់ ៥៦នាក់ផ្សេងទៀតបានរងរបួសនៅលើកោះ Java និង១.៣០០នាក់ត្រូវបានជម្លៀសចេញពីតំបន់រងគ្រោះនោះផងដែរ ខណៈដែលក្រុមជួយសង្គ្រោះបានស្វែងរកជនរងគ្រោះនៅក្រោមស្រទាប់ផេះ។
ភ្នំ Semeru ដែលជាភ្នំខ្ពស់ជាងគេនៅលើកោះជ្វា បានផ្ទុះឡើង កាលពីថ្ងៃសៅរ៍ ដោយបានគ្របដណ្តប់មកលើភូមិក្បែរនោះក្នុងខេត្តជ្វាខាងកើត ហើយបានធ្វើឱ្យប្រជាជនដែលរស់នៅទីនោះត្រូវជម្លៀសចេញភ្លាមៗ ផងដែរ។ ទន្ទឹមនោះ អាជ្ញាធរបាននិយាយថា ការផ្ទុះនេះបានបំផ្លាញអគារ និងស្ពានយុទ្ធសាស្ត្រដែលតភ្ជាប់តំបន់ ២ នៅក្នុងសង្កាត់ Lumajang ក្បែរនោះជាមួយទីក្រុង Malang ។
មន្ត្រី BNPB បាននិយាយ នៅក្នុងសន្និសីទសារព័ត៌មានមួយ កាលពីថ្ងៃអាទិត្យថា មនុស្ស១៤នាក់ត្រូវបានសម្លាប់ ដែល ៩ នាក់ត្រូវបានកំណត់អត្តសញ្ញាណ ហើយមនុស្ស៥៦នាក់បានរងរបួស ដែលភាគច្រើនត្រូវឆេះដោយសារភ្លើង៕