ភ្នំពេញ៖ គិតត្រឹមថ្ងៃទី១០ ខែឧសភានេះ ព្រឹត្តិការណ៍កីឡាចម្រុះប្រចាំតំបន់អាស៊ីអាគ្នេយ៍ SEA Games 2023 នៅកម្ពុជា នៅសល់រយៈពេល ៧ថ្ងៃប៉ុណ្ណោះ នឹងបិទបញ្ចប់វិញហើយ គ្រាដែលការប្រកួតប្រជែងមេដាយដំណើរការត្រឹមថ្ងៃទី១៦ នៃខែដដែល។

យោងតាមកម្មវិធីប្រកួតរបស់គណៈកម្មាធិការរៀបចំព្រឹត្តិការណ៍ ២ឆ្នាំម្តង ហៅកាត់ថា CAMSOC បានបញ្ជាក់ថា គិតមកទល់នឹងពេលនេះ មានកីឡាចំនួន១០ប្រភេទហើយ ក្នុងចំណោម ៣៧ប្រភេទកីឡា បានបិទបញ្ចប់ជាស្ថាពរហើយ និងបានបំពាក់មេដាយដល់អត្តពលិកជយលាភីផងដែរ។

កីឡាទាំង ១០ប្រភេទដែលបានបញ្ចប់បេសកកម្មរបស់ខ្លួនជាផ្លូវការ ក្រោយដំណើរការប្រកួតជាបន្តបន្ទាប់តាំងពីថ្ងៃទី២៩ ខែមេសាមកនោះរួមមាន៖ កីឡាអុកចត្រង្គ ជឺជីតស៊ូ ការ៉ាតេ គុនល្បុក្កតោ កីឡាឧបសគ្គ កីឡាទូកក្តោង សូហ្វតេន្នីស កីឡា TEQBALL ទ្រីយ៉ាត្លុង និងកីឡាវ៉ូវីណាម៕