អាមេរិកប្រកាស ធ្វើពហិការផ្នែកការទូតចំពោះ ព្រឹត្តិការណ៍កីឡាអូឡាំពិករដូវរងា នៅទីក្រុងប៉េកាំង

វ៉ាស៊ីនតោន ៖ សហរដ្ឋអាមេរិកនៅថ្ងៃចន្ទ ទី០៦ ខែធ្នូ បានប្រកាសជាផ្លូវការអំពីការធ្វើពហិការផ្នែកការទូត ចំពោះព្រឹត្តិការកីឡាអូឡាំពិករដូវរងា ដែលនឹងប្រព្រឹត្តទៅនៅទីក្រុងប៉េកាំង ប្រទេសចិន នៅខែកុម្ភៈ ឆ្នាំ២០២២។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នាព្រឹកថ្ងៃអង្គារ ទី០៧ ខែធ្នូ ឆ្នាំ២០២១។

ការសម្រេចចិត្តដោយសហរដ្ឋអាមេរិកខាងលើនេះ គឺជាការឆ្លើយតបទៅនឹងអ្វី ដែលទីក្រុងវ៉ាស៊ីនតោនបានចោទប្រកាន់ ទៅលើរបាយការណ៍សិទ្ធិមនុស្សនៅប្រទេសចិន ជាពិសេសនៅតំបន់ស៊ីនជាំង ហើយវាក៏បានកើតមានឡើងក្រោយពីរដ្ឋបាលលោក ចូ បៃដិន បានចំណាយពេលអស់ជាច្រើនសប្តាហ៍ ដើម្បីគិតគូរអំពីចំណាត់ការ ដែលខ្លួននឹងត្រូវធ្វើក្នុងន័យប្រឆាំងចិន។

ថ្វីបើអត្តពលិកអាមេរិកនឹងនៅតែចូលរួមក៏ដោយ ប៉ុន្តែរដ្ឋបាលរបស់លោកប្រធានាធិបតី Joe Biden នឹងមិនបញ្ជូនតំណាងផ្លូវការណាមួយទៅព្រឹត្តិការណ៍កីឡានោះទេ ដោយសារតែចោទប្រកាន់អំពីបញ្ហាប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិដែលកំពុងបន្តរបស់ចិននៅក្នុងតំបន់ ស៊ីនជាំង ព្រមទាំងការរំលោភសិទ្ធិមនុស្សផ្សេងទៀត។ នេះបើតាមការឲ្យដឹងពីអ្នកនាំពាក្យសេតវិមាន លោកស្រី Jen Psaki។

លោកស្រី Psaki បាន​និយាយបែបនេះ ដោយ​សំដៅ​ទៅ​លើសេចក្តី​រាយការណ៍ អំពីទង្វើរបស់ចិន លើ​ជន​មូស្លីម អ៊ុយហ្គ័រ នៅ​ក្នុង​ទឹកដី​ភាគពាយ័ព្យ​នោះ ដែល​ត្រូវ​បាន​ប្រកាស​ថា ​ជា​អំពើ​ប្រល័យពូជសាសន៍​ទាំង​ដោយ​លោក Biden និង​រដ្ឋបាល​របស់​អតីត​ប្រធានាធិបតី Donald Trump។

ចំពោះមុខក្រុមអ្នកសារព័ត៌មាននៅអាមេរិក នៅថ្ងៃចន្ទសប្តាហ៍នេះ អ្នកនាំពាក្យសេតវិមានលោកស្រី ចេន ផ្សាគី (Jen Psaki) បានលើកឡើងថា «ក្រុមអត្តពលិករបស់សហរដ្ឋអាមេរិក មានការគាំទ្រយ៉ាងពេញទំហឹង ពីសំណាក់យើងទាំងអស់គ្នា។ យើងនឹងស្ថិតនៅពីក្រោយ គាំទ្រពួកគេ ១០០% និងលើកទឹកចិត្តពួកគេពីផ្ទះ…»។

ភ្លាមៗបែបនេះ ទីក្រុងប៉េកាំងមិនទាន់ធ្វើការឆ្លើយតបណាមួយនៅឡើយទេ ប៉ុន្តែកាលពីពេលថ្មីៗកន្លងទៅនេះ ក្រសួងការបរទេសចិនធ្លាប់បានព្រមានថា ខ្លួននឹងមានការប្រឆាំងតបវិញយ៉ាងម៉ឺងម៉ាត់ ប្រសិនបើមានការធ្វើពហិការណាមួយ ចំពោះព្រឹត្តិការណ៍កីឡាអូឡាំពិកខាងលើនេះ។ ដោយឡែក ចក្រភពអង់គ្លេសដែលធ្លាប់បានអះអាងថា នឹងធ្វើការសម្រេចចិត្តដូចសហរដ្ឋអាមេរិកនោះ ក៏នៅមិនទាន់មានប្រតិកម្មអ្វីនៅឡើយដែរ៕