ខេត្តកណ្ដាល៖ អភិបាលខេត្តកណ្ដាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ឯកឧត្តម គង់ សោភ័ណ្ឌ នៅរសៀលថ្ងៃទី១៨ ខែឧសភា ឆ្នាំ២០២៣នេះ បានអញ្ជើញជាអធិបតីទទួលអំណោយមនុស្សធម៌ជាមួយ ថវិកា និងគ្រឿងឧបភោគបរិភោគមួយចំនួនពីសប្បុរសជននានាក្នុងឱកាសខួបលើកទី១៦០ ទិវាពិភពលោកកាកបាទក្រហម ៨ឧសភា ឆ្នាំ២០២៣ ក្រោមប្រធានបទ «រួមជាមួយកាកបាទក្រហមកម្ពុជា ដើម្បីបរិយាបន្នសង្គម»។

ក្នុងនាមសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឯកឧត្តម គង់ សោភ័ណ្ឌ បានថ្លែងអំណរគុណយ៉ាងជ្រាលជ្រៅបំផុតចំពោះសប្បុរសជនទាំងអស់ដែលបានបរិច្ចាគជួយដល់ជនក្រីក្រ ជនងាយរងគ្រោះតាមរយ:សាខាកាកបាទក្រហម។ ឯកឧត្តមបានសន្យាថា សាខាកាកបាទក្រហមកម្ពុជាខេត្ត នឹងយកចិត្តទុកដាក់ប្រើប្រាស់អំណោយដ៏សប្បុរសនេះ ដើម្បីបម្រើសកម្មភាពមនុស្សធម៌ ជួយដល់ប្រជាពលរដ្ឋដែលជួបការលំបាកដោយគ្រោះធម្មជាតិ និងគ្រោះមហន្តរាយផ្សេងៗ នៅក្នុងភូមិសាស្ត្រខេត្តកណ្ដាលដោយម៉ត់ចត់បំផុត មានតួលេខចំណូលចំណាយត្រឹមត្រូវ ចាយវាយតាមប្រព័ន្ធធនាគារ គ្មានការកិបកេងសូម្បីមួយកាក់មួយសេន ពោលគឺច្បាស់លាស់ណាស់លើកិច្ចការនេះ ខណៈដែលមួយឆ្នាំៗសាខាកាកបាទទទួលបានជំនួយចន្លោះពី៤០ម៉ឺនដុល្លារ ទៅ៥០ម៉ឺនដុល្លាសហរដ្ឋអាមរិក ។

សប្បុរសជនដែលចូលរួមឧបត្ថម្ភក្នុងឱកាសខួបលើកទី១៦០ ទិវាពិភពលោកកាកបាទក្រហម អឍ្ឍចន្ទក្រហម ៨ឧសភា ឆ្នាំ២០២៣ រួមមាន៖
១.លោកស្រីឧកញ៉ាមហាឧបាសិកាពុទ្ធសាសនូបត្ថម្ភក៍ សុខ កែវ ឧបត្ថម្ភ អង្ករចំនួន ៥តោន។
២.លោកឧកញ៉ា ជា ដាណា អគ្គនាយក និងប្រធានក្រុមប្រឹក្សាភិបាល នៃសាលាអន្តរជាតិ វេស្ទលែនដ៍ ឧបត្ថម្ភ អង្ករចំនួន ២តោន ,ទឹកសុទ្ធ ១០០កេស ,ត្រីខ ៥០យួរ ,មី ៥០កេស និងថវិកា ២,០០០$។
៣.លោក ប៉េន សុផល និងលោកស្រី ប្រធានសមាគមស្នាមញញឹមថ្មីនៃក្ដីសង្ឃឹមរបស់កុមារ ឧបត្ថម្ភថវិកា ៤០ម៉ឺនរៀល។
៤.លោក ថេង ស៊ុក និងលោកស្រី សុខ ចន្ថា អនិកជនប្រទេសបារាំង ឧបត្ថម្ភថវិកា ៤០ម៉ឺនរៀល។
៥.លោក អាន ធន និងភរិយា ឧបត្ថម្ភថវិកា ៥០$។
៦. Mr. Helon Landingin ប្រធានសមាគមស្នាមញញឹមថ្មីនៃក្ដីសង្ឃឹមនៃកុមារ ទ្រមទាំងគ្រួសារខេត្តតាកែវ ឧបត្ថម្ភថវិកា ២០ម៉ឺនរៀល។
៧. Mr. Francis Landingin ប្រធានសមាគមស្នាមញញឹមថ្មីនៃក្ដីសង្ឃឹមនៃកុមារ អង្គស្នួល ឧបត្ថម្ភថវិកា ២០ម៉ឺនរៀល។
៨.លោកប្រធានសាខាធនាគារជាតិ នៃខេត្តកណ្ដាល ឧបត្ថម្ភថវិកា ១លាន ២សែនរៀល៕