អ៊ីស្រាអែល បើក​ការវាយប្រហារ​ដោយ​គ្រាប់​មី​ស៊ី​ល​ទៅលើ​កំពង់ផែ​សំខាន់​របស់​ស៊ី​រី​

យេ​រ៉ូ​សា​ឡឹម​ ៖ យន្តហោះ​ចម្បាំង​របស់​អ៊ីស្រាអែល​បាន​បាញ់​មី​ស៊ី​លម​កលើ​កំពង់ផែ Latakia ដែលជា​កំពង់ផែ​ដ៏​សំខាន់​មួយ​របស់​ប្រទេស​ស៊ី​រី ដោយបាន​បំផ្លាញ​កុងតឺន័រ ប៉ុន្តែ​មិនមាន​អ្នក​ម្នាក់​ស្លាប់ និង​រងរបួស​នោះទេ​។ នេះ​បើ​យោងតាម​ការបញ្ជាក់​ពី​មន្ត្រី​យោធា​ស៊ី​រី​។​

ទីភ្នាក់ងារសារព័ត៌មាន​រដ្ឋ​ស៊ី​រី SANA បាន​ដកស្រង់​សម្ដី​យោធា​ដែល បាន​និយាយថា ការវាយប្រហារ​នេះ​បាន​កើតឡើង​នៅវេលា​ម៉ោង១ និង២៣នាទី​ព្រឹក (​ម៉ោង​ក្នុងស្រុក​) នៅ​ថ្ងៃ​អង្គារ​នេះ​។ មន្ត្រី​រូបនេះ បន្តថា មី​ស៊ី​ល​ជាច្រើន​គ្រាប់​បាន​វាយប្រហារ​មកលើ​តំបន់​កុងតឺន័រ​នៅក្នុង​កំពង់ផែ ដែល​បណ្ដាល​ឲ្យ​ឆេះ​ខ្ទិចខ្ទី​ពេញ​កំពង់ផែ​នោះ​។ ទន្ទឹម​នោះ លោក​ថា កងការពារ​ដែនអាកាស​របស់​យើង​បាន​ព្យាយាម​ទប់ទល់​នឹង​ការឈ្លានពាន​របស់​អ៊ីស្រាអែល​នៅ​តំបន់ Latakia នោះ​ផងដែរ​។​

គួរ​បញ្ជាក់ថា វា​គឺជា​ការវាយប្រហារ​ដ៏​កម្រ​មួយ​មកលើ​កំពង់ផែ Latakia ដែលជា​កន្លែង​សំខាន់​មួយ​របស់​ប្រទេស​ស៊ី​រី ដែល​ការ​នាំចូល​ទំនិញ​ជាច្រើន​ត្រូវ​ស្តុក​ទុក​នៅ​ទីនោះ​៕