វ៉ាស៊ីនតោន៖ សេតវិមានបានចេញមុខមកបញ្ជាក់ឡើងវិញជាថ្មីថាសហរដ្ឋអាមេរិកមិនគាំទ្រឡើយចំពោះការវាយប្រហារក្នុងទឹកដីរុស្ស៊ី ខណៈកំពុងផ្ដោតលើការជួយអ៊ុយក្រែនការពារខ្លួន និងដណ្ដើមយកទឹកដីរបស់ខ្លួនឯងមកវិញតែប៉ុណ្ណោះ។

នៅក្នុងសេចក្ដីថ្លែងការណ៍មួយ សេតវិមានបានសង្កត់ធ្ងន់ដូច្នេះថា «យើងបានឃើញព័ត៌មាន ហើយកំពុង ប្រមូលព័ត៌មានបន្ថែមពីអ្វីដែលបានកើតឡើង។ ប៉ុន្តែជាគោលការណ៍ យើងមិនគាំទ្រឡើយចំពោះការវាយប្រហារក្នុងទឹកដីរុស្ស៊ី»។

អាជ្ញាធរក្នុងប្រទេសរុស្ស៊ី បានចោទប្រកាន់ត្រង់ៗថាការវាយប្រហារដោយយន្ដហោះដ្រូនទ្រង់ទ្រាយធំលើសង្កាត់អ្នកមានក្នុងទីក្រុងមូស្គូ កាលពីថ្ងៃអង្គារ គឺជាស្នាដៃ របស់អ៊ុយក្រែន ដោយមានគោលដៅលើទីតាំងដែលលោកប្រធានាធិបតី ពូទីន និងឥស្សរជនជាន់ខ្ពស់រុស្ស៊ីដទៃទៀតស្នាក់នៅ។ ប៉ុន្តែ ខាងអ៊ុយក្រែនបានបដិសេធភ្លាមៗថាខ្លួន មិនមានជាប់ពាក់ព័ន្ធនឹងការវាយប្រហារនេះឡើយ។

សូមជម្រាបថា កាលពីថ្ងៃអង្គារសបា្តហ៍នេះ យន្តហោះដ្រូនបានហោះបុកអគារមួយចំនួន នៅទីក្រុងមូស្គូ ប៉ុន្តែវាបានបង្កឱ្យ​មានការខូចខាតតិចតួចប៉ុណ្ណោះ ដោយពុំបានបណ្តាលឱ្យមានមនុស្សរងរបួសនោះទេ ខណៈប្រព័ន្ធការពារដែនអាកាស ក៏បានបាញ់កម្ទេចដ្រូនប៉ុន្មាន​គ្រឿង ផ្សេងទៀត ដែលហោះសំដៅឆ្ពោះមករករដ្ឋធានីរបស់រុស្ស៉ី ផងដែរ៕