គ្រូ​កម្ពុជា​ ៖ ទោះបីជា​ប៉ះ​ប្រេ​ស៊ី​ល​ ​ក៏​យើង​នៅតែ​លេង​គ្រប់គ្រង​បាល់ និង​ប្រជែង​យក​បាល់​ដែរ​

ភ្នំពេញ ៖ ក្រុម​ជម្រើសជាតិ​កម្ពុជា​នឹងត្រូវ​ប៉ះ​ក្រុម​ឥណ្ឌូនេស៊ី នៃ​ការប្រកួត​ទី២ របស់ខ្លួន​ក្នុង​ពូ​ល B នៃព្រឹត្តិការណ៍ AFF Suzuki cup 2020 នៅវេលា​ម៉ោង៧ និង៣០នាទី​យប់នៅ​កម្ពុជា។

ជុំវិញការប្រកួតនេះ លោក Ryu Hirose គ្រូបង្វឹក​ក្រុម​ជម្រើសជាតិ​កម្ពុជា បាន​ឆ្លើយតប​ទៅ​គ្រូបង្វឹក​ឥណ្ឌូនេស៊ី​វិញថា យើង​ចង់​គ្រប់គ្រង​ការលេង​ទល់នឹង​ក្រុម​ណាក៏ដោយ​ដែល​យើង​ជួប​សម្បី​តែ​ប្រេ​ស៊ី​ល ដោយ​រក្សា​ការគ្រប់គ្រង​បាល់ និង​ប្រជែង​យក​បាល់ ហើយ​នេះ​ជា​អ្វីដែល​យើង​កំពុង​ធ្វើ​។

លោកបន្តថា ខ្ញុំ​រីករាយ​ដែល​បានធ្វើការ​ជាមួយ​លោក Honda ដែល​លោក​កំពុង​ដឹកនាំ គម្រោង​អភិវឌ្ឍន៍​បាល់ទាត់​កម្ពុជា និង​ជួយ​គាត់​ពីអ្វី​ដែល​ខ្ញុំ​ធ្វើបាន​ជាមួយ​បទពិសោធន៍​របស់ខ្ញុំ​​។

សូមជម្រាបថា មុននឹង​ការប្រកួត​មកដល់នៅ​យប់​នេះ គ្រូបង្វឹក​ក្រុម​ជម្រើសជាតិ​ឥណ្ឌូណេស៊ី​លោក Shin Tae Yong បាន​និយាយថា កូនក្រុម​លោក​នឹងមិន​បណ្ដោយ​ឲ្យ​ក្រុម​កម្ពុជា លេង​គ្រប់គ្រង​បាល់​ដោយ​ស្រួលៗ​ដូច​កាល​ប៉ះ​ម៉ា​ឡេ​សី​នោះឡើយ​៕