WHO នៅតែ​អះអាងថា វីរុស​ប​ម្លែ​ង​ខ្លួន​ថ្មី Omicron មាន​សភាព​ជំងឺ​ស្រាល​ជាង Delta

ញូវយ៉ក​ ៖ អង្គការ​សុខភាព​ពិភពលោក (WHO) បាន​ឲ្យ​ដឹងថា ទិន្នន័យ​ដំបូង​បង្ហាញថា វីរុស​ប​ម្លែ​ង​ខ្លួន​ថ្មី Omicron នេះ អាច​នឹង​ងាយ​ឆ្លង​អ្នក​ដែល​ធ្លាប់​កើត​ជំងឺ​កូ​វីដ១៩ រួច ឬ​អ្នក​ដែល​បាន​ចាក់​វ៉ាក់សាំង​រួច ប៉ុន្តែ​ក៏​អាច​បង្កឱ្យមាន​ជំងឺ​ស្រាល​ជាង​មុន​ផងដែរ​។​

ប្រធាន​អង្គការ​សុខភាព​ពិភពលោក (WHO) លោក Tedros Adhanom Ghebreyesus បាន​ប្រាប់​ឲ្យ​ដឹង កាលពី​ថ្ងៃ ពុធ ថា មាន​ភស្តុតាង​មួយចំនួន​ដែលថា Omicron បង្កឱ្យមាន​ជំងឺ​ស្រាល​ជាង Delta ។ ប៉ុន្តែ​លោក​បាន​សង្កត់ធ្ងន់ថា ត្រូវការ​ទិន្នន័យ​បន្ថែមទៀត មុនពេល​ធ្វើការ​សន្និដ្ឋាន​ឲ្យ​ច្បាស់​ណាមួយ ហើយ​បាន​ជំ​រុញឱ្យ​ប្រទេស​ទាំងអស់ ពង្រឹង​ការតាមដាន​នៃ​វីរុស​នេះ ដើម្បី​ជួយផ្តល់​ទិន្នន័យ​ឲ្យ​កាន់តែច្បាស់​អំពី​របៀប​ដែល Omicron កំពុង​ចរាចរណ៍​លើ​ពិភពលោក​។​

ការវាយតម្លៃ​នេះ​បាន​កើតឡើង​នៅពេលដែល​ការព្រួយបារម្ភ​ជាស​កល​កាន់តែ​កើនឡើង លើ​ការប្រែប្រួល​យ៉ាងខ្លាំង​នៃ​វីរុស​នេះ ដែល​បាន​បង្ខំ​ឱ្យ​ប្រទេស​រាប់សិប​ប្រទេស បានដាក់​ការ​រឹតបន្តឹង​ច្រកព្រំដែន​ឡើងវិញ និង​បានលើកឡើង​ពី​លទ្ធភាព​នៃ​ការវិលត្រឡប់​ទៅរក​ការផ្អាក​សេដ្ឋកិច្ច​ប្រទេស​វិញ​ផងដែរ​៕