សម្តេច​តេ​ជោ ហ៊ុន សែន បង្ហើប​ពី​ក្បាលម៉ាស៊ីន​គណៈរដ្ឋមន្ត្រី​ថ្មី​មួយ​ត្រៀម​សម្រាប់​ពេលខាងមុខ​

ខេត្តកណ្តាល ៖ សម្តេចតេជោ ហ៊ុន សែន នាយករដ្ឋមន្ត្រី​កម្ពុជា​ នៅថ្ងៃនេះ​បាន​បង្ហើប​ឲ្យ​ដឹងថា ក្បាលម៉ាស៊ីន​គណៈរដ្ឋមន្ត្រី​ថ្មី​ដើម្បី​ត្រៀម​នៅ​ថ្ងៃ​អនាគត​បានរៀបចំ​រួចរាល់​អស់ហើយ ហើយ​នៅ​ថ្ងៃទី​២៤ ខែធ្នូ ឆ្នាំ​២០២១ ខាងមុខនេះ សមាជិក សមាជិកា​គណៈកម្មាធិកា​រ​កណ្តាល​គណបក្ស​ប្រជាជន​កម្ពុជា ចូលរួម​សន្និបាត ដើម្បី​សម្រេច​ទៅលើ​បេក្ខភាព​បន្តវេន​របស់​បក្ស និង​ក្បាលម៉ាស៊ីន​គណៈរដ្ឋមន្ត្រី​នោះ​។​

​សម្តេច​បាន​បញ្ជាក់ថា គណៈរដ្ឋមន្ត្រី​ថ្មី​ដែល​ត្រៀម​នោះ​មិនមែន​សម្រាប់​ឆ្នាំ​២០២៣​នោះទេ តែ​ជាការ​ត្រៀម​បម្រុង​ទុក​សម្រាប់​បន្តវេន​ប៉ុណ្ណោះ ព្រោះ​ឆ្នាំ​២០២៣​សម្តេច​នៅតែ​បន្ត​ដឹកនាំ​ដដែល​។ ​សម្តេច​បញ្ជាក់​បន្ថែមថា​សមាសភាព​គណៈរដ្ឋមន្ត្រី​ដែល​រៀបចំ​ត្រៀប​ពេលអនាគត​នោះ​គឺ​សុទ្ធសឹង​ជា​បណ្ឌិត អនុបណ្ឌិត​។​

សូមជម្រាបថា ការ​ថ្លែង​បែប​នោះ​គឺ​ក្នុង ឱកាស​ដែល​សម្តេច​ហ៊ុន សែន នាយករដ្ឋមន្ត្រី​អញ្ជើញ​ចុះ​ត្រួតពិនិត្យ​ការដ្ឋាន​សាងសង់ ព្រលានយន្តហោះ​អន្តរជាតិ​ភ្នំពេញ​ថ្មី ស្ថិតនៅ​ឃុំ​ព្រែកស្លែង ស្រុក​កណ្តាលស្ទឹង ខេត្តកណ្តាល នៅ​ព្រឹក​ថ្ងៃ​ព្រហស្បតិ៍ ទី​០៩ ខែធ្នូ ឆ្នាំ​២០២១​នេះ​។​

សម្តេច​ក៏បាន​ឲ្យ​ដឹង​ទៀតថា ការរៀបចំ​ត្រៀម​សមាសភាព​គណៈរដ្ឋមន្ត្រី​ថ្មី​នោះ​គឺ​កើតចេញពី​ការប្រជុំ​ពិភាក្សា​និង​ឯកភាពគ្នា​ជាមួយ​សម្តេច​ស ខេង , សម្តេច​សាយ ឈុំ​,​សម្តេច​ទៀ​បាញ់​,​ជំទាវ​ម៉ែន សំអន កាលពី​ថ្មីៗ​នេះ​៕