អឺរ៉ុប ៖ Villarreal បាន​ក្លាយជា​ក្រុម​ចុងក្រោយ​ដែល​ឈានទៅ​វគ្គ​១៦​ក្រុម​ចុងក្រោយ នៃ​ក្របខ័ណ្ឌ Champions League ហើយ ក្រោយ​យកឈ្នះ​លើ​ក្រុម Atalanta ៣-២ ក្នុងការ​ប្រកួត​ចុងក្រោយ​នៃ​ពូ​ល F របស់​ពួកគេ​កាលពី​យប់មិញ​។​

៣​គ្រាប់​របស់​ក្រុម Villarreal របស់​អេ​ស្ប៉ា​ញ​យប់មិញ រកបាន​ដោយ​កីឡាករ​សញ្ជាតិ​ហូ​ឡង់ Arnaut Danjuma ២​គ្រាប់​នៅ​នាទី​ទី​៣​និង​៥១ ខណៈ​១​គ្រាប់​ទៀត​រកបាន​ដោយ​កីឡាករ E. Capoue នាទី​ទី​៤២​។​ចំណែក​២​គ្រាប់​របស់​ក្រុម Atalanta រកបាន​ដោយ​កីឡាករ R. Malinovsky នាទី​ទី​៧១​និង D. Zapata នាទី​ទី​៨០​។​

​លទ្ធផល​នេះ​បានធ្វើ​ឲ្យ Villarreal ក្លាយជា​ក្រុម​ចុងក្រោយ​ដែល​ឈានទៅ​វគ្គ​១៦​ក្រុម​ចុងក្រោយ​នៃ​ក្របខ័ណ្ឌ Champions League បន្ទាប់ពី​បេក្ខភាព​១៥​ក្រុម​ទៀត​ឈរ​រួចជាស្រេច​ដូចជា​៖ Ajax, AT Madrid, Bayern Munich, Benfica , Chelsea, Inter Milan, Juventus, Liverpool , Lille, Man City, Man United, PSG, Real Madrid, Red Bull Salzburg និង Sporting Lisbon​។​

​សូមជម្រាបថា ការចាប់​ឆ្នោត​វគ្គ ១៦ ក្រុម​ចុងក្រោយ នឹង​ចាប់ឆ្នោត​ល្ងាច​ថ្ងៃទី ១៣ ខែធ្នូ​។ ជើង​ទី​១ វគ្គ ១៦​ក្រុម​នឹង​ចាប់ផ្ដើម​លេង​នៅ​ពាក់​កណ្ដាលខែ កុម្ភៈ ឆ្នាំ ២០២២ ខាងមុខ​៕