អាមេរិក ប្រកាស​ដាក់ទណ្ឌកម្ម​សិទ្ធិ​មនុស្ស​លើប្រទេសចិន កូរ៉េខាងជើង មីយ៉ាន់ម៉ា និងបង់ក្លាដែស

វ៉ាស៊ីនតោន ​៖ សហរដ្ឋអាមេរិកនៅថ្ងៃសុក្រសប្តាហ៍នេះ (ពេលវេលានៅវ៉ាស៊ីនតោន) បានសម្រេចដាក់ទណ្ឌកម្មកម្រិតធ្ងន់ធ្ងរ ពាក់ព័ន្ធនឹងបញ្ហាសិទ្ធិមនុស្ស ទៅលើបុគ្គល និងក្រុមហ៊ុននានានៅប្រទេសចិន, មីយ៉ាន់ម៉ា, កូរ៉េខាងជើង និងបង់ក្លាដែស។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នាព្រឹកថ្ងៃសៅរ៍ ទី១១ ខែធ្នូ ឆ្នាំ២០២១។

ជាមួយគ្នានេះ ប្រទេស​កាណាដា និង​ចក្រភព​អង់គ្លេស ក៏បាន​ចូលរួម​ជាមួយ​សហរដ្ឋ​អាមេរិក​ក្នុងការ​ដាក់ទណ្ឌកម្ម​ពាក់​ព័ន្ធ​នឹង​ការរំលោភ​សិទ្ធិមនុស្ស​ក្នុងប្រទេស​មី​យ៉ាន់​ម៉ា ខណៈដែល​ទីក្រុង វ៉ាស៊ីនតោន ក៏បាន​ដាក់ទណ្ឌកម្ម​ថ្មី​ជា​លើកដំបូង​លើ​ប្រទេស​កូរ៉េខាងជើង ក្រោម​ការគ្រប់គ្រង​របស់​ប្រធានាធិបតី​លោក Joe Biden និង​បានកំណត់​គោលដៅ​អង្គភាព​យោធា​មី​យ៉ាន់​ម៉ា ក្នុងចំណោម​អង្គភាព​ដទៃទៀត ក្នុង​សកម្មភាព​សម្គាល់​ថ្ងៃ​សិទ្ធិមនុស្ស​។

វិធានការ​នេះ គឺជា​វិធានការ​ចុងក្រោយ​បំផុត​នៃ​ការដាក់ទណ្ឌកម្ម​ដែល​កំណត់ពេល​ស្របគ្នា​នឹង​កិច្ចប្រជុំ​កំពូល​និម្មិត​រយៈពេល ២ ថ្ងៃ​របស់លោក Biden ដែល​លោក​បានប្រកាស​ពី​គំនិត​ផ្តួចផ្តើម ដើម្បី​ជំរុញ​លទ្ធិប្រជាធិបតេយ្យ​នៅ​ជុំវិញ​ពិភពលោក និង​ផ្ដល់​ការគាំទ្រ សម្រាប់​ច្បាប់​គាំទ្រ​លទ្ធិប្រជាធិបតេយ្យនៅ​សហរដ្ឋអាមេរិក​ផងដែរ​។

សូមជម្រាបថា សហរដ្ឋអាមេរិក និងសម្ព័ន្ធមិត្តបានដាក់បន្ទុកលើប្រទេសចិនកាន់ខ្លាំង ទៅលើបញ្ហាសិទ្ធិមនុស្ស ដែលប្រទេសទាំងអស់នេះបានចោទប្រកាន់ទៅលើចិនថា បាននិងកំពុងរំលោភបំពាន។ ទោះជាយ៉ាងណា ប្រទេសចិនតែងតែច្រានចោល នូវរាល់ការចោទប្រកាន់បែបនេះ។ ដោយឡែកសម្រាប់ប្រទេសកូរ៉េខាងជើងវិញ សហរដ្ឋអាមមេរិកបានដាក់ទណ្ឌកម្ម ទៅលើមន្ត្រីជាន់ខ្ពស់មួយចំនួន ក្នុងនោះក៏រួមមានលោក រី យ៉ុង ជីល (Ri Yong Gil) រដ្ឋមន្ត្រីទទួលបន្ទុកកងទ័ពប្រជាជនកូរ៉េខាងជើងផងដែរ៕