ប្រធានាធិបតីអាហ្វ្រិកខាងត្បូង តេស្តវិជ្ជមានកូវីដ-១៩
អាហ្វ្រិក ៖ ប្រធានាធិបតីអាហ្វ្រិកខាងត្បូងលោក Cyril Ramaphosa កំពុងទទួលការព្យាបាលសម្រាប់មេរោគកូវីដ ១៩ កម្រិតស្រាល បន្ទាប់ពីបានធ្វើតេស្តវិជ្ជមាន កាលពីថ្ងៃអាទិត្យ។
សេចក្តីថ្លែងការណ៍របស់ការិយាល័យប្រធានាធិបតី បានឲ្យដឹងថា លោក Ramaphosa ចាប់ផ្តើមមានអារម្មណ៍មិនស្រួលខ្លួន បន្ទាប់ពីចាកចេញពីពិធីរំលឹករដ្ឋជាកិត្តិយសដល់អតីតអនុប្រធានលោក FW de Klerk នៅទីក្រុង Cape Town នៅថ្ងៃតែមួយនោះ។
ទន្ទឹមនោះ លោកបានផ្ទេរការទទួលខុសត្រូវ និងកិច្ចការទាំងអស់ទៅឲ្យអនុប្រធានាធិបតីលោក David Mabuza សម្រាប់សប្តាហ៍ក្រោយផងដែរ។ ទោះយ៉ាងណាក៏ដោយ មកដល់ពេលនេះ អាការៈនៃជំងឺរបស់លោក មានភាពល្អប្រសើរ ហើយកំពុងត្រូវបានត្រួតពិនិត្យ និងព្យាបាល ដោយសេវាសុខភាពយោធានៃកងកម្លាំងការពារជាតិអាហ្វ្រិកខាងត្បូង។
សូមជម្រាបថា អាហ្វ្រិកខាងត្បូងជាប្រទេសដែលរកឃើញវីរុសកូវីដ ១៩ ពូជ Omicron ដំបូងគេក្នុងពិភពលោក៕