អភិបាលខេត្តកំពតនាំអំណោយកាកបាទក្រហមកម្ពុជាផ្តល់ជូនពលរដ្ឋមានជីវភាពខ្វះខាតជាង១០០គ្រួសារ នៅស្រុកបន្ទាយមាស

ខេត្តកំពត ៖ ឯកឧត្តម ម៉ៅ ធនិន អភិបាលខេត្ត និងជាប្រធានគណៈកម្មាធិការសាខា កាកបាទក្រហមខេត្តកំពតនាព្រឹកថ្ងៃទី១៣ ខែធ្នូ ឆ្នាំ២០២១ បានដឹកនាំក្រុមការងារចុះសំណេះសំណាលសួរសុខទុក្ខ និងនាំយកអំណោយមនុស្សធម៌កាកបាទក្រហមកម្ពុជា ចែកជូនប្រជាពលរដ្ឋក្រីក្រ ជនពិការ ស្ត្រីខ្វះខាតស្បៀងចំនួន១០៤គ្រួសារ មកពីបណ្ដាឃុំផ្សេងៗ នៅស្រុកបន្ទាយមាស។ ពិធីផ្តល់អំណោយនេះបានធ្វើឡើងនៅបរិវេណវត្តសំរោង ស្ថិតក្នុងឃុំសំរោងក្រោម ស្រុកបន្ទាយមាស ខេត្តកំពត ដោយមានការអញ្ជើញចូលរួមពី​អភិបាល​រង​ខេត្ត​ លោក​នាយក​រដ្ឋបាលខេត្ត​ នាយកប្រតិបត្តិសាខាកាកបាទក្រហមកម្ពុជាខេត្តព្រមទាំងអាជ្ញាធរស្រុក ឃុំនិងភូមិផងដែរ។

ក្នុងឱកាសនោះ ឯកឧត្តម ម៉ៅ ធនិន បានផ្តាំផ្ញើសាកសួរសុខទុក្ខ ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចទាំងទ្វេ តែងតែគិតគូរខ្ពស់ពីសុខទុក្ខ និងមានការដោះស្រាយរាល់ការលំបាករបស់ប្រជាពលរដ្ឋ គ្រប់ទីកន្លែង និងគ្រប់ពេលវេលា ដោយមិនរើសអើងពូជសាសន៍ ពណ៌សម្បុរ និងនិន្នាការនយោបាយណាមួយឡើយ ព្រមទាំងមិនទុកឱ្យប្រជាពលរដ្ឋណាម្នាក់ មានទុក្ខលំបាក ហើយគ្មានអាជ្ញាធរណាគិតគូរនោះទេ។

ជាក់ស្តែងក្រោយពេលទទួលបានដំណឹងភ្លាម តាមការចង្អុលបង្ហាញ ពីសម្តេចតេជោ និងសម្តេចកិត្តិព្រឹទ្ធបណ្ឌិត គឺអាជ្ញាធរខេត្ត និងសាខាកាកបាទក្រហមកម្ពុជាខេត្ត បាននាំយកនូវអំណោយមនុស្សធម៌ របស់កាកបាទក្រហមកម្ពុជា មកចែកជូនបងប្អូនប្រជាពលរដ្ឋក្រីក្រខ្វះខាត ជនពិការ និងស្ត្រីខ្វះស្បៀងអាហារ នាពេលនេះ។

គួរបញ្ជាក់ថា អំណោយដែលបានចែកជូនដល់ពលរដ្ឋទាំង ១០៤គ្រួសារខាងលើ ក្នុង១គ្រួសារ ទទួលបានរួមមាន៖ អង្ករ ២៥គីឡូក្រាម, មី ១កេស, ត្រីខកំប៉ុង ១យួរ, ទឹកត្រី ១យួរ, ឃីត ១កញ្ចប់ ម៉ាស់ ១ដុំ និងថវិកា ៥ម៉ឺនរៀល។

ក្រោយបញ្ចប់ការសំណេះសំណាលសួរសុខទុក្ខ និងចែកអំណោយដល់ប្រជាពលរដ្ឋ នៅស្រុកបន្ទាយមាសខាងលើរួចមក គឺលោកអភិបាលខេត្តកំពត ម៉ៅ ធនិន បានដាក់នាំមន្ត្រី អាជ្ញាធរពាក់ព័ន្ធបន្តដំណើរចុះសំណេះសំណាលសួរសុខទុក្ខ និងផ្តល់ស្បៀង ព្រមទាំងថវិកា ដល់អ្នកកើតជំងឺអេដស៍ ចំនួនប្រមាណ១២៥គ្រួសារ ដែលក្នុងមួយគ្រួសារទទួលបានរួមមាន ៖ អង្ករ ២៥គីឡូក្រាម, មី ១កេស, ត្រីខកំប៉ុង ១យួរ, ទឹកត្រី ១យួរ, ឃីត១កញ្ចប់ ម៉ាស់១ដុំ និងថវិកា៥ម៉ឺនរៀលផងដែរ៕ ដោយ ៖ ទ្រី ហៀន