វៀតណាមពង្រឹងការគ្រប់គ្រងតាមបណ្តោយព្រំដែនដើម្បីទប់ស្កាត់ការឆ្លងវីរុសបំប្លែងខ្លួនថ្មី Omicron
វៀតណាម ៖ អាជ្ញាធរនៅភាគខាងត្បូងប្រទេសវៀតណាមបានបង្កើនការគ្រប់គ្រងតាមបណ្ដោយព្រំដែនជាប់ប្រទេសកម្ពុជា បន្ទាប់ពីកម្ពុជាបានរកឃើញករណីដំបូង នៃវីរុសបំប្លែងខ្លួន Omicron ។
លោកវរសេនីយ៍ឯក Doan Van An ស្នងការនយោបាយនៃបញ្ជាការដ្ឋានឆ្មាំព្រំដែនខេត្ត Long An បានប្រាប់កាសែត Tuoi Tre កាលពីថ្ងៃពុធថា មន្ត្រីការពារព្រំដែនក្នុងស្រុកត្រូវបានក្រើនរំលឹកឱ្យមានការប្រុងប្រយ័ត្នបន្ថែមទៀតនៅពេលបំពេញកាតព្វកិច្ច។ លោក An បានសង្កត់ធ្ងន់ថា ពួកគេត្រូវបានតម្រូវឲ្យល្បាតញឹកញាប់ជាងមុន ដើម្បីស្វែងរកអ្នកលួចឆ្លងដែន ការរត់ពន្ធ និងអ្វីដែលសំខាន់បំផុតគឺ ដើម្បីការពារហានិភ័យណាមួយនៃការឆ្លងជំងឺកូវីដ-១៩។
ក្រៅពីប៉ុស្តិ៍ព្រំដែនទាំង១២ មន្ត្រីនៅខេត្ត Long An កំពុងប្រតិបត្តិការប៉ុស្តិ៍ត្រួតពិនិត្យចំនួន៣៦ និងបានបង្កើតអង្គភាពល្បាតចំនួន៦ និងក្រុមការងារចំនួន៧ ដើម្បីរឹតបន្តឹងសន្តិសុខតាមបណ្ដោយព្រំដែន១៣៣គីឡូម៉ែត្រជាប់ប្រទេសកម្ពុជា ។ នៅខេត្តដុងថាប គណៈកម្មាធិការប្រជាជនបានបញ្ជាឱ្យស្ថាប័នពាក់ព័ន្ធពង្រឹងការគ្រប់គ្រងព្រំដែន ៥០ គីឡូម៉ែត្ររបស់ខ្លួនជាប់កម្ពុជា។
យោងតាមលោក Pham Thien Nghia បានឱ្យដឹងថា មន្ត្រីត្រូវបានប្រគល់ភារកិច្ចឱ្យចុះល្បាតបន្ថែមទៀត ជាពិសេសនៅពេលយប់។
លោកវរសេនីយ៍ឯក Tran Quoc Khanh មេបញ្ជាការរងនៃបញ្ជាការដ្ឋានឆ្មាំព្រំដែនខេត្តបានមានប្រសាសន៍ថា នៅខេត្ត An Giang រាល់ផ្លូវទាំងអស់នៅតាមខ្សែបន្ទាត់ព្រំដែនត្រូវបានបិទ។ លោក Khanh បន្តថា កម្លាំងនគរបាលមូលដ្ឋានក៏បានសម្របសម្រួលជាមួយអង្គភាពការពារព្រំដែន ដើម្បីបង្កើនការល្បាតតាមព្រំដែន។ វិធានការស្រដៀងគ្នានេះត្រូវបានគេធ្វើនៅខេត្ត Tay Ninh ផងដែរ។
ក្រសួងសុខាភិបាលកម្ពុជាបាននិយាយនៅក្នុងសេចក្តីថ្លែងការណ៍កាលពីថ្ងៃអង្គារថា កម្ពុជាបានរកឃើញករណីដំបូងនៃមេរោគវីរុសបំប្លែងខ្លួម Omicron លើស្ត្រីវ័យ២៣ឆ្នាំរូបនេះបានត្រឡប់មកពីប្រទេសហ្គាណាតាមរយៈទីក្រុងឌូបៃ និងបាងកក។
សូមជម្រាបថា វីរុសបំប្លែង Omicron ដែលត្រូវបានរកឃើញដំបូងនៅអាហ្វ្រិកខាងត្បូងកាលពីខែមុន ឥឡូវនេះត្រូវបានរាយការណ៍បានឆ្លងរីករាលដាលដល់ប្រទេសជាង ៧០ហើយ។ នេះបើយោងតាមរបាយការណ៍ពីអង្គការសុខភាពពិភពលោក៕