ជើងហោះហើរដំបូងបានមកដល់ និងចុះចតនៅអាកាសយានដ្ឋានអន្តរជាតិសៀមរាប បន្ទាប់ពី​កម្ពុជាសម្រេច​បើក​ប្រទេស​ឡើងវិញ និង​ទទួល​ទេសចរចាក់វ៉ាក់សាំង​ពេញលេញ​

ខេត្ត​សៀម​រាម ​៖ នាព្រឹកថ្ងៃទី១៧ ខែធ្នូ ឆ្នាំ២០២១នេះ ជើងហោះហើរ លេខ SQ164 របស់ក្រុមហ៊ុន Singapore Airlines ចេញដំណើរពីប្រទេសសិង្ហបុរីបានមកដល់ និងចុះចតនៅអាកាសយានដ្ឋានអន្តរជាតិសៀមរាប ដោយសុវត្ថិភាពជាមួយវត្តមាន ភ្ញៀវទេសចរចម្រុះជាតិសាសន៍​ចំនួន​៦៧​នាក់ ។

នេះ​ជា​លើកដំបូង​ ដែល​អាកាសយានដ្ឋាន​អន្តរជាតិ​សៀមរាប បានន​ទទួល​ការ​ចុះចត​ និង​ទទួលភ្ញៀវ​ទេសចរ បន្ទាប់ពី​រាជរដ្ឋាភិបាល បានសម្រេច​បើក​ប្រទេស​ឡើងវិញ និង​ទទួល​ទេសចរ​វ៉ាក់សាំង​ពេញលេញ​។

​ក្នុងឱកាស​ទទួល​ស្វាគមន៍​ការមកដល់​អ្នកទេសច​រ​ចម្រុះ​ជាតិ​សាសន៍​នេះ ឯកឧត្តម ទៀ សីហា អភិបាលខេត្ត​សៀមរាប បាន​ចាត់ទុកថា នេះ​ជា​លើកដំបូង​ហើយ​ដែល​អាកាសយានដ្ឋាន​អន្តរជាតិ​សៀមរាប ក៏ដូចជា​ខេត្តសៀមរាប បានទទួល​អ្នកទេសច​រ​លើកដំបូង​បន្ទាប់ពី​អាក់ខាន​ប្រមាណ​ជា​២​ឆ្នាំ​ដោយសារ​វិបត្តិ​ជំងឺ​កូ​វីដ​១៩ ហើយ​ការមកដល់​របស់​អ្នកទេសចរ​អន្តរជាតិ​នេះ ជា​សញ្ញា​ល្អ​មួយ​ក្នុង​ការជំរុញ​កំណើនសេដ្ឋកិច្ច​របស់​ក​ម្ពុ​ជា ជាពិសេស​ខេត្តសៀមរាប ។​

​យោងតាម ឯកឧត្តម ប៊ុន រដ្ឋា នាយក​អាកាសយានដ្ឋាន​អន្តរជាតិ​សៀមរាប បានឱ្យដឹងថា មាន​ក្រុមហ៊ុន​អាកាសចរណ៍​ចំនួន ២ បានប្រកាស​ចាប់ផ្តើម​ហោះហើរ​មកកាន់​ខេត្តសៀមរាប ចាប់ពី​ថ្ងៃ​១៧ ខែធ្នូ ឆ្នាំ​២០២១​នេះ ពោលគឺ ក្រម​ហ៊ុន​អាកាសចរណ៍​សាំង​ហ្គា​ពួ​អែ​រឡាញ ធ្វើការ​ហោះហើរ​ដឹក​អ្នកដំណើរ​មកកាន់​ខេត្តសៀមរាប និង​ពី​ខេត្តសៀមរាប​ទៅ​សិង្ហ​បុរី​វិញ​ជា​រៀងរាល់ថ្ងៃ និង ក្រុមហ៊ុន​អាកាសចរណ៍ ឡាយ​ម៉ី​អែ​រឡាញ (Lamei Airlines) នឹងធ្វើ​ការហោះហើរ​ពី​ភ្នំពេញ​មក​សៀមរាប និង​ពី​សៀមរាប​ទៅ​បាងកក ពី​បាងកក​មក​សៀមរាប​វិញ ដោយ​ឆ្លងកាត់​ភ្នំពេញ ក្នុង​មួយ​សប្តាហ៍​ពីរ​ជើង​៕​