ថ្ងៃនេះ ​ថៃមាន​អ្នក​ឆ្លង​កូ​វីដ​១៩​ចំនួន​៣,១៣២​ករណីទៀត ​និង​ស្លាប់​២៨​នាក់​

បាងកក ៖ ក្រសួងសុខាភិបាល​ថៃ នៅ​ព្រឹក​ថ្ងៃ​សៅរ៍​នេះ​បានប្រកាសបន្តរកឃើញករណីឆ្លងជំងឺកូវីដ-១៩​ថ្មី​ៗ ចំនួន ៣,១៣២​បន្ថែតទៀត និង​អ្នកស្លាប់​ចំនួន២៨នាក់​ទៀត ​ក្នុង​រយៈពេល២៤ម៉ោង​ចុង​ក្រោយនេះ។​

​ក្នុងចំណោម​ករណី​ឆ្លង​ខាងលើ​គឺមាន​៣,០៣៩​ករណី​ជា​ប្រជាជន​ទូទៅ និង ៣៣​ករណី​ទៀត​ជា​អ្នកទោស​នៅក្នុង​ពន្ធនាគារ​។ ដោយឡែក​កាលពី​ថ្ងៃ​សុក្រ​ម្សិលមិញ អ្នកជំងឺ​កូ​វីដ​១៩​ចំនួន​៣,២៧៨​នាក់​ត្រូវបាន​ចាក​ចេញពី​មន្ទីរពេទ្យ​បន្ទាប់ពី​បានជា​សះស្បើយ​ពី​វីរុស​នេះ​។​

​សូមជម្រាបថា ចាប់តាំងពី​ជំងឺ​រាតត្បាត​បាន​ផ្ទុះឡើង​កាលពីដើម​ឆ្នាំមុន មាន​ករណី​ឆ្លង​កូ​វីដ​១៩​ចំនួន ២,១៨៨,៦២៩​ករណី ដោយ​ក្នុងនោះ ជាសះស្បើយ​ចំនួន ២,១២៣,៩៦៩​នាក់​។ ដោយឡែក​ចំនួន​អ្នក​ស្លាប់មាន​២១,១៦១​នាក់​ក្នុងអំឡុងពេល​រលក​ទី​បី និង ២១,៣៥៥​នាក់ ចាប់តាំងពី​ការចាប់ផ្តើម​នៃ​ជំងឺ​រាតត្បាត​៕