កូរ៉េខាងជើង​ហាម​មិនឱ្យ​ពលរដ្ឋ​សើច​រយៈពេល​១១​ថ្ងៃ​ ក្នុង​ថ្ងៃ​ខួប​១០​ឆ្នាំ​នៃ​មរណភាព​លោក Kim Jong Il

​កូរ៉េខាងជើង ៖ សារព័ត៌មាន koreaboo បានចេញ​ផ្សាយ​ថា ប្រទេស​កូរ៉េខាងជើង​បាន​ហាមឃាត់​មិន​ឲ្យ​ពលរដ្ឋ​សើច​សប្បាយ​រយៈពេល​១១​ថ្ងៃ ដែលជា​ផ្នែក​មួយ​នៃ​ការ​កាន់ទុក្ខ​ដ៏​យូរ​សម្រាប់​ខួប​លើក​ទី​១០​នៃ​មរណភាព​របស់​មេដឹកនាំ​របស់​ពួកគេ​គឺ​លោក Kim Jong Il​។ មិន​ត្រឹមតែ​ហាម​មិន​ឲ្យ​សើច​ប៉ុណ្ណោះ​ទេ ប៉ុន្តែ​ការបង្ហាញ​ភាពសប្បាយ​រីករាយ ការដើរ​ទិញ​ឥ​វ៉ាន់ និង​ផឹកស៊ី​ក៏​ត្រូវបាន​ហាមឃាត់​ដែរ​។​

​ប្រជាពលរដ្ឋ​មិនត្រូវ​បានអនុញ្ញាត​ឱ្យចូល​រួម​ក្នុង​សកម្មភាព​កម្សាន្ត​នោះទេ ហើយ​នៅ​ថ្ងៃ​គម្រប់​ខួប​មរណភាព​របស់លោក Kim Jong Il តូប​លក់​គ្រឿងទេស​ក៏​មិន​ត្រូវបាន​អនុញ្ញាតឱ្យ​ដំណើរការ​ផងដែរ​។ មនុស្ស​ដែល​មិនមាន “​ការ​កាន់ទុក្ខ​ឱ្យបាន​គ្រប់គ្រាន់​” ក៏​នឹងត្រូវ​ពិន័យ និង​ដកចេញ ឬ​យកទៅ​ដាំតំឡូង​។ ក្នុងនោះ ប្រជាពលរដ្ឋ​ណា​ម្នាក់ ដែល​ត្រូវបាន​គេ​មើលឃើញថា​បាន​បំពាន​ច្បាប់​ទាំងនេះ​អាច​ត្រូវបាន​ដកចេញ ដោយ​គ្មាន​ការព្រមាន​ឡើយ និង​ចាត់ទុកជា​ឧក្រិដ្ឋជន​មនោគមវិជ្ជា​។​

​សូមជម្រាបថា លោក Kim Jong Il បាន​គ្រប់គ្រង​ប្រទេស​កូរ៉េខាងជើង​ពី​ឆ្នាំ ១៩៩៤ ដល់​ឆ្នាំ ២០១១ មុនពេល​ត្រូវបាន​ស្នង​តំណែង​បន្ត​ដោយ​កូនប្រុស​ពៅ​របស់លោក គឺ​លោក Kim Jong Un​។ ការស្លាប់​របស់លោក Kim Jong Il ត្រូវបាន​ចុះបញ្ជី​នៅ​ថ្ងៃទី ១៧ ខែធ្នូ​ឆ្នាំ ២០១១៕