ថ្ងៃនេះ ​ថៃមាន​អ្នក​ឆ្លង​កូ​វីដ​១៩ ​ចំនួន​២,៤៧៦​ករណីបន្ថែមទៀត ​និង​ស្លាប់​៣២​នាក់​

បាងកក ៖ ក្រសួងសុខាភិបាល​ថៃ ​នៅ​ព្រឹក​ថ្ងៃ​អង្គារ​នេះ​បានប្រកាសបន្តរកឃើញ​ករណី​ឆ្លងកូវីដ-១៩ ​ថ្មីៗ​ចំនួន ២,៤៧៦​នាក់បន្ថែមទៀត និង​អ្នកស្លាប់​ដោយសារ​ជំងឺដ៏កាច់សាហាវនេះ​ចំនួន៣២នាក់ ទៀតផងដែរ ​ក្នុងអំឡុងពេល២៤ម៉ោង​ចុង​ក្រោយនេះ​។​

​ចំនួនអ្នក​ស្លាប់មានការកើនឡើង​បើ​ប្រៀបធៀប​កាលពី​ម្សិលមិញ​ចំនួន ៣១ នាក់ និង​ករណី​ឆ្លង​ចំនួន ២.៥២៥ ករណី​។ ដោយឡែក​កាលពី​ថ្ងៃ​ចន្ទ​ម្សិលមិញ អ្នកជំងឺ កូ​វីដ​១៩ ចំនួន ៣,៦៤៩ នាក់​ត្រូវបាន​ចាក​ចេញពី​មន្ទីរពេទ្យ បន្ទាប់ពី​បានជា​សះស្បើយ​ពី​វីរុស​នេះ​។​

​សូមជម្រាបថា ចាប់តាំងពី​ផ្ទុះឡើង​នូវ​ជំងឺ​រាតត្បាត​នេះ​នៅ​ដើម​ឆ្នាំមុន ប្រទេស​ថៃ​មាន​ករណី​ឆ្លង​កូ​វីដ​១៩​ចំនួន ២,១៩៦,៥២៩ ករណី ដោយ​ក្នុងនោះ​ជាសះស្បើយ​មាន​ចំនួន ២,១៣៦,១៩៧​នាក់​។ ចំណែក អ្នកស្លាប់​មាន​ចំនួន ២១,៣៤៦ នាក់​ក្នុងអំឡុងពេល​រលក​ទី​បី និង ២១,៤៤០​នាក់ ចាប់តាំងពី​ការចាប់ផ្តើម​នៃ​ជំងឺ​រាតត្បាត​នេះ​៕