អភិបាលខេត្តកែបអំពាវនាវដល់បណ្តាមន្ទីរ អង្គភាព អង្គការ ដៃគូអភិវឌ្ឍន៍ឲ្យបន្ដចូលរួមគាំទ្រគម្រោងសកម្មភាពដែលលើកឡើងដោយរដ្ឋបាលក្រុង និងសង្កាត់
ខេត្តកែប ៖ ឯកឧត្តម សោម ពិសិដ្ឋ អភិបាល នៃគណៈអភិបាលខេត្តកែប បានអំពាវនាវដល់បណ្តាមន្ទីរ អង្គភាពជុំវិញខេត្ត អង្គការ ដៃគូរអភិវឌ្ឍន៍ទាំងអស់ សូមបន្ដចូលរួមគាំទ្រគម្រោងសកម្មភាព ដែលបានលើកឡើងដោយរដ្ឋបាលក្រុង និងសង្កាត់ ដើម្បីឆ្លើយតបទៅនឹងតម្រូវការរបស់ប្រជាពលរដ្ឋនៅមូលដ្ឋាន ឱ្យបានច្រើន។
ការអំពាវនាវរបស់ឯកឧត្តមអភិបាលខេត្តបែបនេះធ្វើឡើងនៅរសៀលថ្ងៃទី២២ ខែធ្នូ ឆ្នាំ២០២១ ក្នុងឱកាសអញ្ជើញជាអធិបតី ក្នុងសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិល (២០២២-២០២៤) ក្រុង និងសង្កាត់ នៅក្រុងកែប។
សិក្ខាសាលាសមាហរណកម្ម កម្មវិធីវិនិយោគបីឆ្នាំរំកិល(២០២២-២០២៤) ក្រុង និងសង្កាត់ នៅថ្នាក់ក្រុង រៀបចំក្នុងគោលបំណងស្វែងរកការគាំទ្រពីមន្ទីរ អង្គភាព ដៃគូរអភិវឌ្ឍន៍ ពាណិជ្ជករ និងសប្បុរសជននានាទាំងក្នុងខេត្ត និងក្រៅខេត្ត ដើម្បីបន្ដជម្រុញកិច្ចដំណើរការគាំទ្រ អភិវឌ្ឍន៍មូលដ្ឋានឲ្យកាន់តែមានប្រសិទ្ធភាព ដើម្បីឲ្យការអភិវឌ្ឍន៍ប្រកបដោយប្រសិទ្ធភាព ពិសេសគឺបានទទួលនូវកំណើនសេដ្ឋកិច្ចខ្ពស់ និងកាត់បន្ថយភាពក្រីក្រជូនប្រជាពលរដ្ឋ៕ ដោយ ៖ ទ្រី ហៀន