គ្រោះទឹកជំនន់នៅម៉ាឡេស៊ី សម្លាប់មនុស្សកើនដល់៣៣នាក់
ម៉ាឡេស៊ី ៖ អាជ្ញាធរបាននិយាយថា ចំនួនអ្នកស្លាប់ដោយសារគ្រោះទឹកជំនន់ដ៏ធំនៅក្នុងប្រទេសម៉ាឡេស៊ីបានកើនឡើងដល់ ៣៣ នាក់ហើយគិតត្រឹមថ្ងៃពុធម្សិលមិញ។
យោងតាមទីភ្នាក់ងារសារព័ត៌មានរដ្ឋ Bernama បានឱ្យដឹងថា រដ្ឋ Selangor មានអ្នកស្លាប់ចំនួន២៤នាក់ ខណៈដែលមនុស្ស ៩ នាក់ផ្សេងទៀតត្រូវបានបញ្ជាក់ថាបានស្លាប់នៅក្នុងរដ្ឋ Pahang ។ សាកសពមួយចំនួនត្រូវបានគេរកឃើញនៅក្នុងផ្ទះ ខណៈខ្លះទៀតត្រូវបានគេរកឃើញពេលទឹកស្រកចុះ។
ចំនួនអ្នកជម្លៀសខ្លួនដោយសារទឹកជំនន់នៅក្នុងប្រទេសម៉ាឡេស៊ីបានធ្លាក់ចុះមកនៅប្រហែល៦២,៣៧២នាក់នៅក្នុងរដ្ឋចំនួន៦បូករួមទាំងដែនដីសហព័ន្ធនៃទីក្រុងគូឡាឡាំពួ គិតត្រឹមម៉ោង ១០:០០យប់មិញ។ នេះបើតាមទិន្នន័យពីនាយកដ្ឋានសុខុមាលភាពសង្គមម៉ាឡេស៊ី ។
រដ្ឋដែលរងគ្រោះខ្លាំងជាងគេនៅតែជារដ្ឋ Pahang នៅតាមបណ្តោយឆ្នេរភាគខាងកើតប្រទេសម៉ាឡេស៊ី ដោយមនុស្សជាង ៣៧.០០០ នាក់ត្រូវបានជម្លៀសទៅកាន់មជ្ឈមណ្ឌលសង្គ្រោះ បន្ទាប់មកគឺរដ្ឋ Selangor ដែលមានជាង ២២.០០០ នាក់ត្រូវបានជម្លៀសចេញ។
នាយកដ្ឋានឧតុនិយមរបស់ប្រទេសនេះបានព្រមានពីភ្លៀងធ្លាក់បន្ថែមទៀតនៅក្នុងប្រទេសម៉ាឡេស៊ី លាយឡំនិងព្យុះដែលរំពឹងទុកថានឹងកើតឡើងនៅក្នុងរដ្ឋមួយចំនួននៅថ្ងៃព្រហស្បតិ៍នេះ៕