ថ្ងៃនេះ ​ថៃមាន​អ្នក​ឆ្លង​កូ​វីដ​១៩​ចំនួន​២,៧៦៦​ករណីបន្ថែមទៀត ​និង​ស្លាប់​៣០​នាក់​

បាងកក ៖ ក្រសួងសុខាភិបាល​ថៃ ​នៅ​ព្រឹក​ថ្ងៃ​សៅរ៍​នេះ​បានប្រកាសបន្តរកឃើញករណី​ឆ្លង​កូ​វីដ​១៩​ថ្មី​ចំនួន ២,៧៦៦​ករណី​បន្ថែមទៀត និង​អ្នកស្លាប់​ចំនួន​៣០​នាក់​ទៀត​ផងដែរ ក្នុង​រយៈពេល ២៤​ម៉ោង​ចុង​ក្រោយនេះ។​

​បើតាមក្រសួងសុខាភិបាល​ថៃបញ្ជាក់ថា ក្នុងចំណោម​ករណី​ឆ្លង​ខាងលើ​គឺមាន​២,៧០៣​ករណី​ជា​ប្រជាជន​ទូទៅ និង ៥៧​ករណី​ទៀត​ជា​អ្នកទោស​នៅក្នុង​ពន្ធនាគារ​។ ​ដោយឡែក​កាលពី​ថ្ងៃ​សុក្រម្សិលមិញ​អ្នកជំងឺ​កូ​វីដ​១៩​ចំនួន​៣,៨០៥​នាក់​ត្រូវបាន​ចាក​ចេញពី​មន្ទីរពេទ្យ​បន្ទាប់ពី​បានជា​សះស្បើយ​ពី​វីរុស​នេះ​។​

​សូមជម្រាបថា ចាប់តាំងពី​ជំងឺ​រាតត្បាត​បាន​ផ្ទុះឡើង​នៅ​ដើម​ឆ្នាំមុន ថៃ​មាន​ករណី​ឆ្លង​កូ​វីដ​១៩​ចំនួន ២,២០៧,៤៣៨​ករណី ដោយ​ក្នុងនោះ​ជាសះស្បើយ​ចំនួន ២,១៤៨,៧៥៧​នាក់​។ ចំណែក​ចំនួន​អ្នក​ស្លាប់មាន​២១,៤៦៤​នាក់​ក្នុងអំឡុងពេល​រលក​ទី​បី និង ២១,៥៥៨​នាក់ ចាប់តាំងពី​ការចាប់ផ្តើម​នៃ​ជំងឺ​រាតត្បាត​នេះ​៕