សេអ៊ូល ៖ សារព័ត៌មានរដ្ឋកូរ៉េខាងជើង KCNA បានចេញផ្សាយនៅព្រឹកថ្ងៃពុធ ទី២០ ខែតុលា ឆ្នាំ២០២១នេះថា ប្រទេសនេះពិតជាបានធ្វើតេស្ត មីស៊ីលបាលីស្ទីកថ្មីមួយគ្រាប់ចេញពីនាវាមុជទឹកមួយគ្រឿងប្រាកមែន កាលពីថ្ងៃអង្គារម្សិលមិញ បន្ទាប់ពីកូរ៉េខាងត្បូង និងជប៉ុនបានអះអាងជាបន្តបន្ទាប់ អំពីការចាប់បានសញ្ញានៃការធ្វើតេស្ត។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters។

ប្រព័ន្ធ​ផ្សព្វផ្សាយ​រដ្ឋ​មួយបាន​ឲ្យ​ដឹង នៅ​ថ្ងៃ​ពុធ​នេះ​ថា មី​ស៊ី​ល​ផ្លោង​ប្រភេទ​ថ្មី​មាន​ឈ្មោះថា SLBM ត្រូវបាន​បាញ់​បង្ហោះ​ឡើង​ចេញពី​នាវាមុជទឹក១គ្រឿង​។

ទីភ្នាក់ងារ​ព័ត៌មាន​រដ្ឋ​កូរ៉េខាងជើង KCNA បាន​រាយការណ៍​ថា មី​ស៊ី​ល​នេះ​មាន​បច្ចេកវិទ្យា​ណែនាំ​ការត្រួតពិនិត្យ​កម្រិត​ខ្ពស់ ដោយ​បន្ថែមថា ​វា​ត្រូវបាន​គេ​បាញ់​ចេញពី​នាវា​តែមួយ ដែល​កូរ៉េខាងជើង​បាន​ប្រើ​នៅក្នុង​ការសាកល្បង​មី​ស៊ី​ល​ប្រភេទ​នេះ លើកដំបូងកាលពី៥ឆ្នាំមុន​។ មកដល់ពេលនេះ នៅ​មិនទាន់មាន​របាយការណ៍​ណា ដែល​បញ្ជាក់ថា ការសាកល្បង​បាញ់​នោះ​មាន​វត្តមាន​របស់​មេដឹកនាំ​កូរ៉េខាងជើង លោក គីម ជុង​អ៊ុន ចូលរួម​ដែរ ឬទេ​។​

បើតាមក្រុមអ្នកជំនាញអន្តរជាតិ ដែលបានមើលឃើញរូបភាពបាញ់សាកល្បងមីស៊ីល បញ្ចេញដោយប្រទេសកូរ៉េខាងជើងនោះថា គ្រាប់មីស៊ីល SLBM ថ្មីខាងលើនេះ គឺមានរូបរាងតូច និងស្តើងជាង បើធៀបនឹងគ្រាប់មីស៊ីល SLBM ដែលទីក្រុងព្យុងយ៉ាងបានបង្ហាញកាលពីមុន ឬអាចថា វាជាគ្រាប់មីស៊ីល ដែលពុំធ្លាប់មានអ្នកបានឃើញនោះឡើយពីមុនមក។

ក្រុមអ្នកជំនាញថែមទាំងបានអះអាងទៀតថា គ្រាប់មីស៊ីលដែលមានទំហំកាន់តែតូច នោះក៏មានន័យថា វាអាចផ្ទុកបានកាន់តែច្រើននៅក្នុងនាវាមុជទឹកតែមួយគ្រឿង បើទោះបីជាត្រូវថមថយរយៈចម្ងាយ នៃការបាញ់ក៏ដោយ។ វាក៏មានន័យថា ការអភិវឌ្ឍនាវាមុជទឹកបំពាក់គ្រាប់មីស៊ីល ដែលអាចមានសមត្ថភាព ពាំក្បាលគ្រាប់នុយក្លេអ៊ែររបស់កូរ៉េខាងជើង ពិតជាកំពុងរីកចម្រើនកាន់តែលឿន ដែលអាចឈានទៅដាក់ឲ្យធ្វើប្រតិបត្តិការនៅថ្ងៃអនាគត។

គួរ​បញ្ជាក់ថា កូរ៉េខាងជើង​ត្រូវបាន​ហាមឃាត់​មិនឱ្យ​ធ្វើការ​តេស្ត​មី​ស៊ី​ល​ក្រោម​ទណ្ឌកម្ម​របស់​អង្គការសហប្រជាជាតិ​៕