ថ្ងៃនេះ ថៃមានអ្នកឆ្លងកូវីដ១៩ ចំនួន៣,៨៩៩ករណី និងស្លាប់១៩នាក់ទៀត
បាងកក ៖ ក្រសួងសុខាភិបាលថៃ នៅព្រឹកថ្ងៃពុធនេះបានប្រកាសបន្តរកឃើញករណីឆ្លងកូវីដ១៩ថ្មីចំនួន៣,៨៩៩ករណីបន្ថែមទៀត និងស្លាប់ចំនួន១៩នាក់ ក្នុងរយៈពេល២៤ម៉ោងចុងក្រោយនេះ។
បើតាមក្រសួងសុខាភិបាលថៃបញ្ជាក់ថា ក្នុងចំណោមករណីឆ្លងថ្មីខាងលើគឺមានចំនួន ៣,៨៧៨ករណីជា ប្រជាជនទូទៅ និង ៦៨ករណីទៀតជាអ្នកទោសនៅក្នុងពន្ធនាគារ។ ដោយឡែកកាលពីថ្ងៃអង្គារម្សិលមិញ អ្នកជំងឺកូវីដ១៩ចំនួន ២,៥០៨នាក់ត្រូវបានចាកចេញពីមន្ទីរពេទ្យ បន្ទាប់ពីបានជាសះស្បើយពីវីរុសនេះ។
សូមជម្រាបថា ចាប់តាំងពីជំងឺរាតត្បាតបានផ្ទុះឡើងនៅដើមឆ្នាំ ២០២០ ប្រទេសថៃ មានករណីឆ្លងកូវីដ១៩ចំនួន ២,២៣៩,៤៧៥ករណី ដោយក្នុងនោះជាសះស្បើយចំនួន ២,១៨២,៨២៩នាក់។ ចំណែកអ្នកស្លាប់មានចំនួន ២១,៦៧៥ នាក់ក្នុងអំឡុងពេលរលកទីបី និង ២១,៧៦៩នាក់ ចាប់តាំងពីការចាប់ផ្តើមនៃជំងឺរាតត្បាត៕