ឥណ្ឌាចាប់ផ្ដើម​ចាក់​វ៉ាក់សាំង​ដូ​ស​ជំរុញ​ដល់​ក្រុមមនុស្ស​​ងាយ​រងគ្រោះ​ ខណៈកំពុងរងគំរាមកំហែងពី Omicron

ញូ​វ​ដេលី ​៖ ប្រទេស​ឥណ្ឌា កាលពី​ថ្ងៃ​ច័ន្ទ បានចាប់ផ្តើម​ផ្ដល់​វ៉ាក់សាំង​ការពារ​ជំងឺ​កូ​វីដ ១៩ ដូ​ស​ជំរុញ ដល់​កម្មករ​ជួរមុខ និង​មនុស្ស​ចាស់​ដែល​ងាយ​រងគ្រោះ ខណដែល​វីរុស Omicron កំពុង​បង្ក​ហានិភ័យ​ដល់​ប្រទេស​នេះ កាន់តែខ្លាំង​ឡើងៗ ។

ទន្ទឹម​នោះ កាលពី​ថ្ងៃ​ច័ន្ទ ប្រទេស​ឥណ្ឌា បាន​រាយការណ៍​ពី​ករណី​ឆ្លង​ថ្មី​ចំនួន ១៧៩,៧២៣ ករណី ដែល​ភាគច្រើន​នៅក្នុង​ទីក្រុង​ធំជាងគេ របស់​ប្រទេស​នេះ​គឺ New Delhi, Mumbai និង Kolkata ដែលជា​កន្លែង​វីរុស Omicron កំពុង​ចរាចរណ៍​ខ្លាំង​ផងដែរ​។​

ដោយឡែក អ្នកស្លាប់​មាន​ចំនួន ១៤៦ នាក់ ត្រូវបាន​រាយការណ៍ កាលពី​ថ្ងៃ​ច័ន្ទ ដូចគ្នា ដែលនាំឱ្យ​ចំនួន​អ្នកស្លាប់​សរុប​កើន​ដល់ ៤៨៣,៩៣៦ ករណី ចាប់តាំងពី​ជំងឺ​រាតត្បាត​នេះ​វាយប្រហារ​នៅក្នុង​ប្រទេស ឥណ្ឌា ជា​លើកដំបូង កាលពី​ឆ្នាំ ២០២០ ។

សូមជម្រាបថា ឥណ្ឌា កំពុង​បង្ហាញ​សញ្ញា​អាក្រក់​នៃ​ការឆ្លង​ជំងឺ​កូ​វីដ ១៩ ជាថ្មី​ម្ដងទៀត ក្រោយ​វីរុស​ប​ម្លែ​ង​ខ្លួន​ថ្មី Omicron កំពុង​គំរាមកំហែង​៕