ថ្ងៃនេះ ​ថៃមាន​អ្នក​ឆ្លង​កូ​វីដ​១៩​ចំនួន​៧,៧៩៣​ករណី ​និង​ស្លាប់​១៨​នាក់ទៀត​

​បាងកក ៖ ក្រសួងសុខាភិបាល​ថៃ ​នៅ​ព្រឹក​ថ្ងៃ​សៅរ៍​នេះ បានប្រកាសបន្តរកឃើញ​អ្នក​ឆ្លង​ជំងឺ​កូ​វីដ​-១៩​ថ្មី​ចំនួន៧,៧៩៣ ករណី​បន្ថែមទៀត និង​ស្លាប់ដោយសារជំងឺដ៏កាចសាហាវនេះចំនួន១៨នាក់ទៀតផងដែរ ​ក្នុង​រយៈពេល ២៤ ម៉ោង​ចុង​ក្រោយនេះ​។​

​បើតាមក្រសួងសុខាភិបាល​ថៃបញ្ជាក់ថា ក្នុងចំណោម​ករណី​ឆ្លង​ថ្មី​ខាងលើ​គឺមាន​ចំនួន ៧,៥២៣​ករណី​ជា​ប្រជាជន​ទូទៅ ​និង​២២​ករណី​ទៀត​ជា​អ្នកទោស​នៅក្នុង​ពន្ធនាគារ​។ ដោយឡែក​កាលពី​ថ្ងៃ​សុក្រ​ម្សិលមិញ អ្នកជំងឺ​កូ​វីដ​១៩​ចំនួន​៥,២០២​នាក់​ត្រូវបាន​ចាក​ចេញពី​មន្ទីរពេទ្យ​បន្ទាប់ពី​បានជា​សះស្បើយ​ពី​វីរុស​នេះ​។​

​ចាប់តាំងពី​ជំងឺ​រាតត្បាត​នេះ​បាន​ផ្ទុះឡើង​កាលពីដើមឆ្នាំ ២០២០ ថៃ​មាន​ករណី​ឆ្លង​កូ​វីដ​សរុប​ចំនួន ២,៣១៦,៤០៨​ករណី​ក្នុងនោះ​មាន ២,២៨៧,៥៤៥​ករណី​ចាប់តាំងពី​ការផ្ទុះ​ឡើង​លើក​ទី​៣ ខណៈ​ករណី​ជាសះស្បើយ​សរុប​ចំនួន ២,២១៧,១២៤​នាក់​។​ ចំនួន​អ្នកស្លាប់​សរុប​មាន​ចំនួន ២១,៩១៦​នាក់​ចាប់តាំងពី​ការចាប់ផ្តើម​នៃ​ជំងឺ​រាតត្បាត​នេះ​បាន​ផ្ទុះឡើង ដោយ​ក្នុងនោះ​២១,៨២២​នាក់​ចាប់​ពីង​ពី​ការផ្ទុះ​ឡើង​លើក​ទី​៣ ៕