ឯកឧត្តម ហ៊ុន ម៉ាណែត ៖ យុវជនបន្តវេនរបស់គណបក្សប្រជាជន ត្រូវមាន​ជំហរ​រឹងមាំ ក្នុងការ​តម្កល់​ផល​ប្រយោជន៍​ជាតិ​ជា​ធំ

ខេត្តកំពង់ឆ្នាំង ៖ ឯកឧត្តម ហ៊ុន ម៉ាណែត បានបញ្ជាក់ថា យុវជនបន្តវេនរបស់គណបក្សប្រជាជនកម្ពុជា ត្រូវមានជំហររឹងមាំ ក្នុងការតម្កល់ផលប្រយោជន៍ជាតិជាធំ ពង្រឹងការឯកភាពផ្ទៃក្នុង ព្រមទាំងបង្កើនការយល់ដឹងឱ្យបានច្បាស់លាស់នូវរបត់ នៃភូមិសាស្ត្រនយោបាយក្នុងតំបន់ និងសកលលោក ដើម្បីធានាបាននូវការ ថែរក្សា ការពារសុខសន្តិភាពលើទឹកដីកម្ពុជា នាពេលបច្ចុប្បន្ន ។

ឯកឧត្តម ហ៊ុន ម៉ាណែត សមាជិកគណៈអចិន្ត្រៃយ៍​នៃ​គណៈកម្មាធិការកណ្តាល និងជា​ប្រធានយុវជនគណបក្សប្រជាជនកម្ពុជាថ្នាក់កណ្តាល ថ្លែងក្នុងពិធីប្រកាស សមាសភាព​ក្រុមការងារ​យុវជន​គណបក្ស​ខេត្តកំពង់ឆ្នាំង ​កាលពីថ្ងៃទី១៥ ​ខែមករា ។

ក្នុងឱកាសនោះ ឯកឧត្តម ហ៊ុន ម៉ាណែត បានធ្វើការរំលឹកថា គណបក្សប្រជាជនកម្ពុជា ក្រោមការដឹកនាំរបស់សម្តេចតេជោ រួមជាមួយថ្នាក់ដឹកនាំ សមាជិក​សមាជិកា បាន​ស្រោចស្រង់​ជីវិតរបស់ពលរដ្ឋកម្ពុជា បានចំនួនបីដងធំៗរួចមកហើយរួមមាន៖ ទី១.ការរំដោះប្រជាពលរដ្ឋ​ចេញពីការ​សម្លាប់​រង្គាល​របស់​របបប៉ុលពត​ ទី២.ការជួយ​ពលរដ្ឋឱ្យចាកចេញពី​សង្គ្រាម​បង្ហូរឈាម​រវាង​ខ្មែរ និងខែ្មរ តាមរយៈការបង្កើតនូវនយោបាយឈ្នះ ឈ្នះ បញ្ចប់សង្គ្រាមផ្ទៃក្នុងទូទាំងប្រទេស ដោយ​នាំមកនូវសន្តិភាពពេញលេញពាសពេញផ្ទៃប្រទេស និងទី៣.ការយកឈ្នះ​លើ​សមរភូមិកូវីដ-១៩​ ដែលបានឆក់យកជីវិតប្រជាពលរដ្ឋជាច្រើនក្នុងរយៈពេលដ៏ខ្លី ដោយសម្តេចតេជោ​បានធ្វើ​ការ​សម្រច​ចិត្តជាយុទ្ធសាស្ត្រត្រឹមត្រូវ តាមរយៈការ​ពិចារណា​វិនិច្ឆ័យ​ និង​សម្រេច​អារកាត់​រហ័ស ​ ទាន់ ពេលវេលា ​ទាំងក្នុងការទិញ​វ៉ាក់សាំង​ និងការចំណាយថវិកា​ព្យាបាលប្រជាពលរដ្ឋ រហូតបង្ក​លក្ខណៈឱ្យមានការបើកដំណើ​ការប្រទេសឡើងវិញ​លើ​គ្រប់​វិស័យ​ព្រម​ទាំង​បន្តស្រោចស្រព​ វ៉ាក់សាំងដូសជំរុញទីបី និងទីបួន ដើម្បីធានាការពារអាយុជីវិតប្រជាពលរដ្ឋពីជំងឺដ៏កាច សាហាវនេះ។

ទាំង​នេះ​គឺជា​សមិទ្ធផល​ដ៏មិនអាចកាត់ថ្លៃពុំបាន​ដែលប្រមុខដឹកនាំ​គណបក្សប្រជាជន​និងសមាជិក សមាជិកាបានខិតខំប្រឹងប្រែងលើសពីការងារ​ស្នូលរបស់ខ្លួន​ក្នុងបុព្វហេតុការពារអាយុជីវិត ពលរដ្ឋ ធានាបាននូវភាពសុខសាន្តជូនប្រជាពលរដ្ឋនិងសង្គមជាតិ។

ឯកឧត្តម ប្រធានយុវជនថ្នាក់កណ្តាល បានគោរព និងកោតសរសើរនូវគំរូវីរភាពរបស់យុវជន ជំនាន់មុនដែលជាគំរូពោរពេញដោយភាពអំណត់អត់ធន់ព្យាយាម និងក្តីសង្ឃឹម ព្រមទាំង​មានចក្ខុវិស័យ និងការ​ផ្តួចផ្តើម​ខ្ពស់​ក្នុងការតស៊ូរំដោះជាតិ ចេញពីរបបខ្មៅងងឹត​បែកបាក់​ខ្ទេចខ្ទាំ ឱ្យមក​ជា​មានការរៀបចំ​ដឹកនាំគ្រប់គ្រងលើគ្រប់វិស័យ និងមានការអភិវឌ្ឍជាតិគួរជាទីមោទនៈ ដូច្នេះ ជាយុវជនជំនាន់ក្រោយត្រូវចង់ចាំ និងអនុវត្តតាមគំរូវីរភាពដ៏ប្រពៃថ្លៃថ្លាល្អផូរផង់នៃអ្នកដឹកនាំ ជំនាន់មុនដើម្បីពង្រឹងនិងពង្រីកចក្ខុវិស័យក្នុងការលើកកម្ពស់នូវសមត្ថភាពប្រកាន់ខ្ជាប់នូវគុណតម្លៃ ជាបុគ្គល ស្មោះត្រង់ មានគុណធម៌ សីលធម៌ និងការតស៊ូប្តូរផ្តាច់ក្នុងបុព្វហេតុរបស់គណបក្ស បម្រើជាតិ និងប្រជាជនព្រមទាំងការពារនិងថែរក្សាឱ្យបាននូវតម្លៃសុខសន្តិភាព ដែល​ជា​មូលដ្ឋានគ្រឹះនៃការអភិវឌ្ឍគ្រប់វិស័យ ជូនជាតិមាតុភូមិ និងប្រជាជន៕