ថ្ងៃនេះ ​ថៃមាន​អ្នក​ឆ្លង​កូ​វីដ​១៩​ចំនួន​៦,៩២៩​ករណី ​និង​ស្លាប់​១៣​នាក់​ទៀត​

បាងកក ៖ ក្រសួងសុខាភិបាល​ថៃ នៅ​ព្រឹក​ថ្ងៃ​ចន្ទ​នេះបានប្រកាសរកឃើញ​ករណី​ឆ្លងជំងឺកូវីដ-១៩ ​ថ្មី ចំនួន៦.៩២៩ករណីបន្ថែមទៀត និង​អ្នកស្លាប់​ដោយសារ​ជំងឺដ៏កាចសាហាវនេះចំនួន១៣នាក់​ទៀត និង​ ​ក្នុង​រយៈពេល២៤ម៉ោង​ចុង​ក្រោយនេះ​។ នេះបើយោងតាមការចេញផ្សាយដោយសារព័ត៌មាន Bangkok post។

​បើតាមក្រសួងសុខាភិបាល​ថៃបញ្ជាក់ថា ក្នុងចំណោម​ករណី​ឆ្លង​ថ្មី​ខាងលើ​គឺមាន​ចំនួន ៦,៧២០​ករណី​ជា​ប្រជាជន​ទូទៅ និង ២០៩​ករណី​ទៀត​ជា​អ្នកទោស​នៅក្នុង​ពន្ធនាគារ​។ ដោយឡែក​កាលពី​ថ្ងៃអាទិត្យ​ម្សិលមិញ អ្នកជំងឺ​កូ​វីដ​១៩​ចំនួន​៥,២៥៥​នាក់​ត្រូវបាន​ចាក​ចេញពី​មន្ទីរពេទ្យ​បន្ទាប់ពី​បានជា​សះស្បើយ​ពី​វីរុស​នេះ​។​

​សូមជម្រាបថា ចាប់តាំងពី​ជំងឺ​រាតត្បាត​នេះ​បាន​ផ្ទុះឡើង​នៅ​ដើមឆ្នាំ ២០២០ ប្រទេស​ថៃ​មាន​ករណី​ឆ្លង​កូ​វីដ​១៩​សរុប​ចំនួន​២,៣៣១,៤១៤​ករណី​ក្នុងនោះ​ករណី​ជាសះស្បើយ​មាន​ចំនួន ២,២២៧,២៦៦​នាក់​។ ចំណែក​ចំនួន​អ្នកស្លាប់​សរុប​មាន​ចំនួន ២១,៩៣៨​នាក់​៕