រុស្ស៊ីរកឃើញវីរុស Delta ទម្រង់ថ្មីដែលឆ្លងខ្លាំង និងលឿនជាងវីរុសដើម
រុស្ស៊ី ៖ អ្នកវិទ្យាសាស្ត្រជាន់ខ្ពស់នៃរដ្ឋាភិបាលរុស្ស៊ីបានព្រមាននៅថ្ងៃព្រហស្បតិ៍នេះថា ប្រទេសរុស្ស៊ីបានរកឃើញវីរុសបំប្លែងខ្លួន Delta ទម្រង់ថ្មីដែលអាចបង្កហានិភ័យដល់ការឆ្លងរាលដាល និងការស្លាប់នៅទូទាំងប្រទេស។ នេះបើយោងតាមប្រភពពីសារព័ត៌មាន CGTN។
យោងតាមលោក Kamil Khafizov ដែលជាប្រធានក្រុមអ្នក វិទ្យាសាស្ត្រ Rospotrebnadzor បានប្រាប់សារព័ត៌មាន Interfax ថា“វីរុសបំប្លែងខ្លួនDelta ទម្រង់ថ្មី ប្រភេទ AY.4.2 ត្រូវបានគេរកឃើញលើអ្នកធ្វើចត្តាឡីស័កនៅក្នុងប្រទេសរុស្ស៊ី” ។ លោកបានបន្ថែមថា “វាទំនងជារីករាលដាលយ៉ាងទូលំទូលាយនៅក្នុងប្រទេសរុស្ស៊ីនិងពិភពលោក។ លោក Khafizov បាននិយាយថា វីរុបប្រភេទ AY.4.2 អាចឆ្លងលឿនជាងវីរុសបំប្លែងខ្លួន Delta ដល់ទៅ ១០ ដងឯណោះ” ។
មន្ត្រីសុខាភិបាលរុស្ស៊ីនិយាយថា វីរុសបំប្លែងខ្លួន Deltaគឺជាប្រភេទវីរុសបំប្លែងខ្លួនដ៏លេចធ្លោក្នុងរលកទីបួននៃរោគរាតត្បាតកូវីដ ១៩ ដែលបានគ្របដណ្ដប់លើមន្ទីរពេទ្យរបស់ប្រទេស ចំពេលមានអត្រាចាក់វ៉ាក់សាំងទាប ។ ប៉ុន្តែអ្នកវិទ្យាសាស្ត្របានបង្ហាញទំនុកចិត្តលើប្រសិទ្ធភាពរបស់វ៉ាក់សាំងរុស្ស៊ីប្រឆាំងនឹងវីរុសប្រភេទ AY.4.2 ពីព្រោះប្រភេទថ្មីនេះមិនខុសគ្នាជាមួយវីរុស Delta ទម្រង់ដើមខ្លាំងប៉ុន្មានទេ ៕